لاہور: (دنیا نیوز) پنجاب میں صوبائی اسمبلی کے الیکشن کی تاریخ سے متعلق لاہور ہائیکورٹ کے فیصلے کے بعد زمان پارک کے باہر پاکستان تحریک انصاف کے کارکنان جشن منانے لگے۔
لاہور ہائیکورٹ میں تحریک انصاف کی درخواست منظور ہونے پر پی ٹی آئی کارکنوں کے چہرے خوشی سے کھل اٹھے، کارکنان نے عمران تیرے جانثار، بے شمار کے نعرے لگائے۔
اس موقع پر پارٹی رہنماؤں کا کہنا تھا کہ یہ تحریک انصاف نہیں بلکہ آئین وجمہوریت کی جیت ہے، مسلم لیگ (ن) ڈرنے کے بجائے الیکشن کے میدان میں مقابلہ کرے۔
خیال رہے کہ پنجاب میں انتخابات کی تاریخ نہ دینے کے کیس میں پی ٹی آئی کی درخواست منظور کرتے ہوئے لاہور ہائیکورٹ نے الیکشن کمیشن کو انتخابات کی تاریخ دینے کا حکم دے دیا ہے۔
