لاہور: (دنیا نیوز) پاکستان سمیت دنیا بھر میں آج آبادی کا عالمی دن منایا جارہا ہے۔
اس دن کو منانے کا مقصد آبادی کے بڑھنے سے پیدا ہونے والے مسائل اور حل کو اجاگر کرنا ہے، آبادی کا عالمی دن اس سال اس عنوان سے منایا جارہا ہے کہ نوجوانوں کو ایسے حالات مہیا کئے جائیں جہاں وہ خاندان بنانے کا فیصلہ آزادانہ طور پر کرسکیں۔
پاکستان تقریباً 24 کروڑ آبادی کے ساتھ دنیا میں آبادی کے لحاظ سے 5واں بڑا ملک ہے، جس میں سے 44 فیصد غربت کی لکیر سے نیچے زندگی گزار رہی ہے۔
بڑھتی ہوئی آبادی ایک سنگین مسئلہ ہے اس کو قابو نہ کیا تو ہم موسمیاتی تبدیلی، غذائی قلت، پانی کی کمی، غذائیت کی کمی، بے روزگاری، نوزائیدہ اموات سمیت شدید مسائل کا مزید شکار ہوں گے، عملی اقدامات کے ساتھ لوگوں میں شعور اجاگر کرنے کی بھی ضرورت ہے۔
واضح رہے کہ پہلی مردم شماری کے بعد سے 2027ء تک پاکستان کی آبادی میں 8 گنا اضافہ متوقع ہے۔
