چولستان: (دنیا نیوز) آرمی یوتھ انگیجمنٹ پروگرام کے تحت بہاولپور ڈویژن سے تعلق رکھنے والے طلبہ پر مشتمل وفد نے چولستان میں گرین پاکستان انیشی ایٹو کے تحت جاری مختلف منصوبوں کا دورہ کیا۔
وفد کے اراکین نے شجرکاری کے مقامات، جدید آبپاشی نظام اور ماحول دوست ترقیاتی منصوبوں کا قریب سے مشاہدہ کیا۔
اس موقع پر طلبہ نے مقامی ماہرین سے تبادلۂ خیال کرتے ہوئے منصوبوں کی تکنیکی اور ماحولیاتی تفصیلات سے آگاہی حاصل کی، شرکاء نے ان منصوبوں کو پاکستان کے سبز اور پائیدار مستقبل کیلئے نہایت اہم قرار دیا۔
طلباء و طالبات نے اس بات پر خوشی کا اظہار کیا کہ انہیں لسانی، فکری اور سائنسی لحاظ سے سیکھنے کا موقع ملا، جس سے نہ صرف ان کا علم بڑھا بلکہ ماحولیاتی چیلنجز کے حل کے بارے میں ان کی سوچ بھی مزید نکھری۔
انہوں نے پاک فوج اور حکومتِ پاکستان کے اس منصوبے میں کردار کو سراہتے ہوئے کہا کہ یہ ایک شاندار قومی خدمت کی مثال ہے جو آنے والی نسلوں کیلئے ایک مثبت ورثہ ثابت ہوگی۔
