پشاور: (دنیا نیوز) خیبرپختونخوا کے 13 اضلاع میں 7 روز کے لئے دفعہ 144 نافذ کر دی گئی۔
اعلامیے کے مطابق خیبرپختونخوا کے 13 اضلاع میں چہلم امام حسینؓ کے موقع پر دفعہ 144 نافذ کی گئی ہے، موٹرسائیکل کی ڈبل سواری، وال چاکنگ، اشتعال انگیز تقریروں پر پابندی ہوگی۔
نوٹیفکیشن کے مطابق پشاور، کوہاٹ، ہنگو، بنوں، ٹانک، ڈیرہ اسماعیل خان، ایبٹ آباد، مانسہرہ، ہری پور، نوشہرہ، کرم، مردان اور لکی مروت میں 7 روز کیلئے دفعہ 144 نافذ کی گئی، چہلم جلوسوں کی گزرگاہوں پر چھتوں پر موجودگی بھی ممنوع ہوگی۔
افغان باشندوں کی عوامی مقامات پر نقل و حرکت پر بھی پابندی عائد کر دی گئی، اسلحہ کی نمائش، ہوائی فائرنگ، لاؤڈ سپیکر اور آتشبازی پر پابندی ہوگی۔
اعلامیے کے مطابق دفعہ 144 کے تحت 13 اضلاع میں غیر متعلقہ افراد کا داخلہ محدود کر دیا گیا، شہریوں سے حکومتی احکامات پر سختی سے عمل کی اپیل کی گئی ہے۔
