لاہور: (دنیا نیوز) محکمہ موسمیات نے کہا ہے کہ آج ملک کے بیشتر علاقوں میں موسم گرم اور مرطوب رہنے کا امکان ہے جبکہ کل سے بارشوں کی پیشگوئی ہے، رات کو بالائی خیبر پختونخوا، کشمیر، شمال مشرقی پنجاب اور خطہ پوٹھوہار میں مطلع جزوی ابر آلود رہنے کے علاوہ تیز ہواؤں اور گرج چمک کے ساتھ چند مقامات پر بارش ہونے کا امکان ہے۔
محکمہ موسمیات نے کراچی سمیت ملک بھر میں کل سے مزید بارشوں کی پیشگوئی کی ہے، آج مون سون کی ہوائیں شدت سے بالائی علاقوں میں داخل ہوں گی، یہ مون سون ہوائیں بحیرہ عرب اور خلیج بنگال سے داخل ہوں گی۔
بارشوں کے باعث پہاڑی علاقوں میں لینڈ سلائیڈنگ اور نشیبی علاقے زیرآب آنے کا خدشہ ہے، اسلام آباد، راولپنڈی، لاہور سمیت دیگرشہروں میں کل سے27 اگست تک بارش کا امکان ہے، گوجرانوالہ، سیالکوٹ، نارووال، فیصل آباد، سرگودھا میں کل سے بارش ہونے کی توقع ہے۔
خوشاب، میانوالی، بھکر، لیہ، ڈی جی خان اور ملتان میں تیز بارش کا امکان ظاہر کیا گیا ہے، بھکر، لیہ، مظفر گڑھ، ڈی جی خان، راجن پور، رحیم یار خان میں کل سے 25 اگست تک بارشیں ہونے کی توقع ہے۔
پشاور، چارسدہ، نوشہرہ، مردان، کوہاٹ میں کل سے26 اگست تک تیز بارش اور ژالہ باری ہونے کا امکان ہے، بنوں، لکی مروت، ڈی آئی خان، باجوڑ، گلگت بلتستان،کشمیر میں بھی کل سے بارش ہونے کی توقع ہے۔
کوئٹہ، ژوب، شیرانی، بارکھان، خضدار، قلعہ عبداللہ میں کل سے25 اگست تک بارش کا امکان ہے، پنجگور، کیچ، کراچی، سکھر، لاڑکانہ، شہید بینظیر آباد، دادو، جیکب آباد، جامشورو میں بھی بارش ہونے کی توقع ہے۔
محکمہ موسمیات نے راولپنڈی، لاہور، گوجرانوالہ، سیالکوٹ، نارووال، پشاور، نوشہرہ میں اربن فلڈنگ کا خدشہ ظاہر کیا ہے، مردان، ایبٹ آباد، مانسہرہ، دیر، گلگت بلتستان اور کشمیر میں فلیش فلڈنگ ہو سکتی ہے۔
محکمہ موسمیات نے کہا ہے کہ بارشوں کے دوران عوام احتیاط کریں اور غیرضروری سفرسے گریز کریں۔
