لاہور: (دنیا نیوز) ملک میں مون سون بارشوں کا 8 واں سپیل، لاہور کے مختلف علاقوں میں کہیں تیز تو کہیں ہلکی بارش ہوئی جس کے بعد گرمی اور حبس کی چھٹی ہوگئی۔
پنجاب کے مختلف شہروں پتوکی، شیخوپورہ، مریدکے، کامونکی، ڈسکہ اور سمبڑیال میں بھی بادلوں کی گرج برس ہوئی، قصور میں موسلا دھار بارش سے جل تھل ایک ہوگیا، نشیبی علاقوں میں کئی کئی فٹ پانی جمع ہوگیا، بارش کا پانی دکانوں اور گھروں میں داخل ہوگیا، سڑکیں ندی نالوں کا منظر پیش کرنے لگیں۔
آزاد کشمیر کے مختلف علاقوں میں بھی بادل خوب برسے۔
واضح رہے کہ بونیر میں سیلاب میں بہہ جانے والے 13 افراد تاحال لاپتہ ہیں، مختلف مقامات پر سرچ آپریشن جاری رہا، ریسکیو حکام نے بتایا کہ گزشتہ 10 روز میں 296 افراد کی لاشیں لواحقین کے حوالے کی گئیں۔
غذر میں تالی داس کے مقام پر ریلیف آپریشن جاری رہا، شاہراہ غذر کی بحالی کیلئے کام کا آغاز کر دیا گیا، دائن پل بحال نہ ہونے سے 3 ہزار کی بستی شہر سے کٹ کر رہ گئی، صوبائی حکومت نے عارضی کشتیوں کے ذریعے لوگوں کی مدد کی۔
ترجمان فیض اللہ فراق نے گفتگو کرتے ہوئے بتایا کہ گلگت بلتستان حکومت متاثرین کیلئے وفاق سے ملکر متبادل گاؤں بنائے گی۔
