لاہور: (محمد اشفاق) پاکستان تحریک انصاف کے سابق سینیٹر اعجاز چوہدری نے 9 مئی کے مقدمات میں سنائی گئی سزاؤں کی معطلی کے لیے لاہور ہائیکورٹ سے رجوع کر لیا۔
اعجاز چوہدری کی جانب سے ایڈووکیٹ میاں علی اشفاق نے سزا معطلی کی درخواستیں دائر کیں۔
درخواست میں مؤقف اپنایا گیا ہے کہ سابق سینیٹر کے خلاف 9 مئی واقعات سے متعلق سرور روڈ اور شادمان تھانوں میں درج مقدمات میں انسدادِ دہشت گردی کی خصوصی عدالت نے سزا سنائی جبکہ وہ کیس کے آغاز سے ہی گرفتار ہیں اور اب تک جیل میں قید ہیں۔
ایڈووکیٹ میاں علی اشفاق نے مؤقف اختیار کیا کہ اعجاز چوہدری کی سزا کے خلاف اپیلیں عدالتِ عالیہ میں پہلے ہی زیرِ سماعت ہیں، ٹرائل کورٹ نے انہیں حقائق کے برعکس سزا سنائی اور انہیں سیاسی انتقامی کارروائی کا نشانہ بنایا گیا۔
درخواست میں عدالت سے استدعا کی گئی ہے کہ اپیلوں پر فیصلے تک اعجاز چوہدری کی سزا معطل کر کے ان کی ضمانت منظور کی جائے اور رہائی کا حکم دیا جائے۔
