اسلام آباد: (دنیا نیوز) رواں سال کا پہلا 'سپر مون' آج نظر آئے گا۔
ترجمان سپارکو کے مطابق سپر مون کے دوران چاند زمین سے تقریباً 2 لاکھ 24 ہزار میل کے فاصلے پر ہوگا جو ایک عام مکمل چاند سے 6.6 فیصد بڑا اور 13 فیصد زیادہ روشن ہو گا، سپر مون کا نظارہ پاکستان میں بھی کیا جا سکے گا۔
سپر مون سورج غروب ہونے کے فوراً بعد مشرق سے طلوع ہو گا اور طلوع آفتاب سے پہلے مغرب میں غروب ہو جائے گا۔
سپارکو کے مطابق رواں سال مزید 2 سپر مونز نظر آئیں گے، سال کا سب سے روشن سپر مون 5 نومبر 2025 کو متوقع ہے جبکہ رواں سال کا تیسرا سپر مون 5 دسمبر کو نظر آئے گا۔
سپر مون کیا ہوتا ہے؟
ماہرین فلکیات کے مطابق سپر مون اس وقت ظاہر ہوتا ہے جب چاند اپنے مدار میں گھومتے ہوئے زمین کے قریب ترین فاصلے پر ہوتا ہے، اس وجہ سے چاند معمول کے مقابلے نمایاں طور پر بڑا اور روشن دکھائی دیتا ہے یہی وجہ ہے کہ اسے سپر مون کہا جاتا ہے۔
