لاہور: (محمد اشفاق) پنجاب اسمبلی میں مبینہ غیر قانونی بھرتیوں کے مقدمے میں بڑی پیش رفت سامنے آئی ہے۔
اینٹی کرپشن عدالت لاہور نے سابق وزیراعلیٰ پنجاب چودھری پرویز الہٰی سمیت دیگر ملزمان پر فرد جرم عائد کرنے کا فیصلہ کرتے ہوئے 6 نومبر کو ملزمان کو فرد جرم کیلئے طلب کر لیا۔
اینٹی کرپشن عدالت کے جج جاوید اقبال وڑائچ نے گزشتہ سماعت کا 3 صفحات پر مشتمل تحریری حکم جاری کیا۔
عدالت نے تحریری حکم میں لکھا کہ چودھری پرویز الہٰی کی ایک روزہ حاضری معافی کی درخواست دائر کی اور نجی ہسپتال کا میڈیکل سرٹیفکیٹ پیش کیا، چودھری پرویز الہٰی کی ایک روزہ حاضری معافی کی درخواست پر پراسکیوٹر نے اعتراض عائد کیا، پراسکیوٹر نے کہا کہ پراسکیوشن کے مطابق پرویز الہٰی گزشتہ سماعت پر بھی پیش نہیں ہوئے تھے۔
تحریری حکم میں کہا گیا کہ پراسکیوٹر نے کہا کہ ابھی اس مقدمے میں فرد جرم عائد نہیں ہوئی، پراسکیوشن نے عدالت سے بریت کی درخواستوں پر دلائل کی مہلت کی استدعا کی۔
تحریری حکم میں لکھا گیا کہ عدالت آئندہ سماعت پر پراسکیوشن کی بریت کی درخواستوں پر دلائل طلب کرتے ہوئے سماعت 6 نومبر تک ملتوی کرتی ہے، اینٹی کرپشن لاہور نے مقدمے کا چالان عدالت میں پیش کر رکھا ہے۔
یاد رہے کہ چودھری پرویز الہٰی سمیت دیگر پر پنجاب اسمبلی میں میرٹ کے برعکس بھرتیوں کا الزام عائد کیا گیا ہے۔
