شکاگو: (ویب ڈیسک) دنیا کی معروف ترین میراتھون دوڑوں میں سے ایک، شکاگو میراتھون 2025 میں پاکستانی رنرز نے ایک بار پھر متاثر کن کارکردگی کا مظاہرہ کیا۔
اس ورلڈ میجر میراتھون میں دنیا بھر سے 53 ہزار سے زائد رنرز شریک ہوئے، جن میں پاکستان سمیت امریکا، برطانیہ، ناروے، متحدہ عرب امارات اور دیگر ممالک میں مقیم پاکستانی اور پاکستانی نژاد رنرز بھی شامل تھے جنہوں نے عمدہ کارکردگی کا مظاہرہ کر کے نہ صرف پاکستانی رننگ کمیونٹی بلکہ ملک اور قوم کا نام بھی روشن کیا۔
پاکستانی نژاد امریکی رنر سید علی حمزہ نے شاندار کارکردگی دکھاتے ہوئے ’’سب تھری‘‘ فنش کیا، انہوں نے 2 گھنٹے 55 منٹ 14 سیکنڈ میں فاصلہ طے کر کے ایونٹ میں شریک تمام پاکستانی رنرز میں سب سے تیز ہونے کا اعزاز حاصل کیا۔
پاکستانی امریکن سلمان الیاس نے 2 گھنٹے 56 منٹ 39 سیکنڈ میں مکمل کیا جبکہ نزار نایانی نے 2 گھنٹے 57 منٹ 43 سیکنڈ میں اپنی دوڑ مکمل کی۔
پاکستان میں مقیم رنرز میں سب سے نمایاں کارکردگی ملک کے معروف میراتھون رنر کراچی کے فیصل شفیع نے دکھائی جنہوں نے 3 گھنٹے 18 منٹ اور 52 سیکنڈ میں دوڑ مکمل کی، فیصل شفیع نے اپنی کارکردگی کو اپنے کیریئر کی یادگار ترین دوڑ قرار دیا۔
کراچی سے تعلق رکھنے والی دانیا علی نے بھی شکاگو کی سڑکوں پر تاریخ رقم کر دی، انہوں نے ورلڈ میراتھون میجرز میں اپنا ڈیبیو کرتے ہوئے 4 گھنٹے 45 منٹ 7 سیکنڈ میں دوڑ مکمل کی، جو ان کے کیریئر کی بہترین کارکردگی بھی ہے۔
ایونٹ میں شریک مجموعی طور پر پاکستانی خواتین رنرز میں عائشہ قمر نے 3 گھنٹے اور ایک منٹ میں فاصلہ طے کر کے نمایاں کارکردگی دکھائی، جبکہ لندن کی ماہین سلیمان شیخ نے 3 گھنٹے 55 منٹ 29 سیکنڈ اور کراچی کی ثناء ملک نے 4 گھنٹے 26 منٹ 27 سیکنڈ میں دوڑ مکمل کی۔
ایونٹ میں پاکستان کے دیگر نمایاں رنرز میں کراچی کے بلال عمر نے فاصلہ 3 گھنٹے 39 منٹ، اسلام آباد کے یاور صدیقی نے 3 گھنٹے 45 منٹ، کراچی کے شاہ فیصل خان نے 3 گھنٹے 57 منٹ، ڈاکٹر صفدر علی نے 4 گھنٹے 6 منٹ، عباس نقی نے 4 گھنٹے 12 منٹ، یاسر سلیمان میمن نے 4 گھنٹے 18 منٹ اور تاجدار اقبال نے 4 گھنٹے 21 منٹ میں فاصلہ طے کیا۔
اسماعیلی برادری کے روحانی پیشوا پرنس رحیم آغا خان نے اپنی سالگرہ کے روز شکاگو میراتھون میں 4 گھنٹے انسٹھ منٹ پچیس سیکنڈ میں فاصلہ مکمل کیا، راستے میں موجود ان کے چاہنے والوں نے ’’ہیپی برتھ ڈے‘‘ کے نعروں سے ان کا پرتپاک استقبال کیا۔
ایلیٹ کیٹیگری میں یوگنڈا کے جیکب کپلِمو نے 2 گھنٹے 2 منٹ 23 سیکنڈ میں فاصلہ مکمل کر کے مردوں کا اعزاز حاصل کیا، جبکہ خواتین میں ایتھوپیا کی ہاوی فیسا گجیجا نے 2 گھنٹے 14 منٹ 56 سیکنڈ کے ساتھ پہلی پوزیشن حاصل کی۔
