لندن: (ویب ڈیسک) آکسفورڈ یونیورسٹی سے تعلق رکھنے والی تحقیقی ٹیم نے انکشاف کیا ہے کہ ذیابیطس قسم دوم کی وجہ بننے والا جین دریافت کرلیا گیا ہے۔ سائنس دانوں کا کہنا ہے کہ پیٹ پر جمع ہونے والی چربی کا سبب بننے والا جین KLF 14 ہی دراصل ذیابیطس قسم دوم (ٹائپ 2) کا ذمہ دار ہے۔
ایک سائنسی تحقیق پر مبنی رپورٹ کے مطابق KLF 14 مردوں میں فالتو چربی کو پیٹ میں جمع کرتا ہے جب کہ خواتین میں یہی جین کمر سے نچلے حصے میں چربی رکھتا ہے اور یہی چربی ذیابیطس کا باعث بنتی ہے۔ تاہم مرد و عورت میں جسم کے دیگر حصوں میں جمع ہونے والی چربی ذیابیطس کا باعث نہیں بنتی اور نہ ان حصوں میں چربی جمع ہونے کا ذمہ دار جین KLF 14 ہے۔ اگر اس جین کا تجزیاتی مطالعہ کیا جائے تو ذیابیطس جیسے موذی مرض پر قابو پایا جا سکتا ہے۔
وزن کو متوازن رکھنے، بہتر غذا کے استعمال، باقاعدہ ورزش اور طرز زندگی میں معمولی تبدیلی سے ذیابیطس کے خدشات کو کم کیا جا سکتا ہے۔ پاکستان سمیت دنیا بھر میں ذیابیطس کا مرض تیزی سے پھیلتا جارہا ہے اور بڑی عمر میں شرح اموات کی سب سے بڑی وجہ بھی یہی مرض ہے جو دل، گردے، دانت اور آنکھوں کے امراض کا سبب بھی بنتا ہے۔
