سان فرانسسكو: (ویب ڈیسک) کئی ویب سائٹس نے خبر دی ہے کہ آئی فون سال کے وسط تک کم ازکم 10 نئے سستے ماڈل متعارف کرائے گا جبکہ تجزیہ کاروں اور ٹیکنالوجی کی ویب سائٹس نے بھی عندیہ دیا ہے کہ ایپل نئے آئی فون پر کام کر رہا ہے اور اس بار سستے آئی فون پیش کیے جائیں گے۔
ٹیک کرنچ ویب سائٹ کے مطابق آئی فون نے یوریشیئن اکنامک کمیشن ڈیٹا بیس میں اس ہفتے کم سے کم 11 نئے فون ماڈلز کی درخواست دائر کی ہے۔ یاد رہے کہ اس بار کسی نئے آئی فون کی بجائے آئی فون ایس ای ٹو جیسے سیٹ پیش کیے جائیں گے تاہم اس میں آئی او ایس الیون کو شامل کیا جائے گا۔ یوریشین ڈیٹا بیس آئی فون کے اندر کی خبریں لانے میں غیر معمولی شہرت رکھتا ہے۔
دوسری جانب ٹیکنالوجی کی مشہور ویب سائٹ گزموڈو نے کہا ہے کہ آئی فون ایس ای آئی فون کے پرانے پرزوں سے تیار کیے جارہے ہیں جو صارفین کی جیب پر بھاری نہیں ہوں گے۔ اس طرح دو برس بعد ایپل کمپنی آئی فون ایس ای سیریز کو اپ ڈیٹ بھی کرے گی۔
ذرائع کا یہ بھی کہنا ہے کہ آئی فون ایکس ٹو اور آئی فون ایکس ٹو پلس کے نام سے سستے ایل سی ڈی فون تیاری کے مراحل میں ہیں لیکن وہ ستمبر سے پہلے مارکیٹ میں پیش نہیں کیے جائیں گے۔ لیکن آئی فون ایس ای ٹو کے نئے ماڈلز شاید جون میں منظرِ عام پر آئیں گے جو قدرے سستے ہوں گے۔ گزموڈو کے مطابق ان فون کی قیمت 1000 ڈالر سے کم رکھی جائے گی اور اس طرح ایپل کمپنی صارفین کو سرپرائز دینا چاہتی ہے۔
