ٹوکیو(نیٹ نیوز)جاپانی ماہرین نے ایک حیرت انگیز ٹرانسفارمر روبوٹ بنایا ہے جو چند لمحوں میں ایک مکمل کار میں تبدیل ہوجاتا ہے ،اسے جے ڈایٹی رائیڈ کا نام دیا گیا ہے جو ایک طرح سے جاپانی سائبرو ٹرون کی نقل ہے۔ مکمل طور پر تبدیل ہونیوالا حقیقی روبوٹ چار میٹر بلند ہے اور وہ زمین بوس ہوکر ایک کار میں تبدیل ہو جاتا ہے ۔
جے ڈایٹی رائیڈ کو جاپان کی تین مشہور کمپنیوں نے مل کر تیار کیا ہے اور اس پر گزشتہ چار برس سے کام جاری تھا۔ اب اسے نومبر میں فلوریڈا میں ہونیوالی ایک ٹیکنالوجی نمائش میں پیش کیا جائیگا۔اسے ٹرانسفارمر سے متاثر ہوکر تیار کیا گیا ہے۔
یہ روبوٹ کار میں بدلنے کے بعد 60 کلومیٹر فی گھنٹہ کی رفتار سے دوڑ سکتا ہے اور انہی پہیوں کی مدد سے یہ روبوٹ بھی آگے بڑھتا ہے تاہم اس کے چلنے کی رفتار بہت سست ہے جو 100 میٹر فی گھنٹہ ہے اور یہی وجہ ہے کہ انجینئر روبوٹ کے بجائے کار کی رفتار زیادہ فخر سے بتاتے ہیں۔
لیکن اس کی حرکات اور تمام فیچرز بہت حیرت انگیز ہیں جو جاپانی انجینئروں کی مہارت کا ایک عمدہ شاہکار بھی ہے۔ انجینئرزکے مطابق کار میں آسانی سے دو افراد بیٹھ سکتے ہیں۔ اگلے مرحلے میں یہ رپورٹ کمرشل بنیادوں پر فروخت کیا جائیگا۔
