لاہور(نیٹ نیوز) سائنس دان چھونے اور محسوس کرنے جیسی حسیاسیت کے حامل مصنوعی بازو اور ہاتھ بنانے میں کامیاب ہوگئے ہیں۔
رپورٹ کے مطابق سائنس دان طویل تحقیق کے بعد مصنوعی ہاتھوں کو محسوس کرنے والے اعصاب دینے میں کامیاب ہوگئے ہیں جس کے باعث مصنوعی بازو کسی چیز کے ٹھنڈا گرم ہونے ، سخت و نرم ہونے اور ٹھوس و مائع میں تمیز کرنے کے قابل ہوجائیں گے۔
مصنوعی اعضا استعمال کرنے والے افراد اس ٹیکنالوجی کی مدد سے چیزوں کو محسوس کرسکیں گے۔ رپورٹ کے مطابق سائنس دانوں نے اعصاب کا کام برقیاتی فیڈ بیک سے لیا جس کیلئے ایک نگران الگورتھم تیار کیا گیا ہے جو کرنٹ کے بہاؤ کو قابو میں رکھتا اور مانیٹرنگ بھی کرتا ہے جس سے مصنوعی بازو استعمال کرنے والے صارفین انسانی ہاتھ کی طرح حس سے لبریز ہو جائیں گے یعنی مصنوعی ہاتھ سے پکڑنے والی اشیا کو محسوس بھی کیا جا سکے گا جبکہ اس سے قبل مصنوعی اعضا حس سے عاری ہوتے تھے۔
سائنس روبوٹک نامی جریدے میں شائع ہونے والے مقالے میں مصنف کا کہنا تھا کہ مصنوعی اعضا کی انگلیوں کے پوروں میں محسوس کرنے کے اعصاب کی جگہ الیکٹریکل کرنٹ کو استعمال کیا گیا ہے جس میں پیغامات کو وصول کرنے اور بھیجنے کی صلاحیت موجود ہے۔
