لاہور: (ویب ڈیسک) ایسا ہم سب کے ساتھ ہوتا ہے، ایک ایسا لمحہ جب کسی بھی وجہ سے ہاتھ سے سمارٹ فون پھسل کر نیچے فرش پر جا گرتا ہے، جس کے بعد اس کے خراب ہونے کا خطرہ ہوتا ہے۔
خوش قسمتی سے اب ایپل ایک ایسی منفرد ٹیکنالوجی کو اپنے آئی فون کا حصہ بنانے جارہی ہے جو کہ ایسے حادثے کی صورت میں ڈیوائس کے گلاس کو ٹوٹنے سے بچائے گی۔ ایپل کی جانب سے سمارٹ شاک آبزربرز نامی ٹیکنالوجی کا اضافہ رواں سال کے آئی فونز میں کیے جانے کا امکان ہے تاکہ حادثاتی طور پر گرنے کی صورت میں سکرین کو نقصان نہ ہو، چاہے فون میں کوئی کیس نہ بھی ہو۔
یہ شاک آبزربر ایسے ڈیزائن کیے گئے ہیں جو ڈیوائس فرش سے ٹکرانے سے کچھ سیکنڈ پہلے آئی فون کے سائیڈ میں سپرنگ کی طرح باہر نکل آتے ہیں، جس کے بعد وہ فون کو نقصان سے بچاتے ہیں۔ ایپل کی اس ٹیکنالوجی کی تفصیلات حال ہی میں یو ایس پیٹنٹ اینڈ ٹریڈمارک میں جمع کرائے گئے پیٹنٹ سے ہوا۔
پیٹنٹ کے مطابق ایپل کی جانب سے سمارٹ فون کے اندر موشن سنسرز کو استعمال کیا جائے گا جو کہ فون گرنے کی صورت میں اس کے اثر کی تیاری کریں گے۔ پراکسمیٹی سنسرز کو ڈیوائس کو ممکنہ ٹکراﺅ سے ہونے والے اثر کی شناخت کے لیے استعمال کیا جائے گا۔ ان سنسرز کا ڈیٹا پراسیسر میں جائے گا جو کہ انتہائی تیزی سے تجزیہ کرکے یہ جانے گا کہ آئی فون کا کونسا حصہ زمین سے ٹکرانے والا ہے۔ فون کے خطرے کی زد میں آنے والے حصے کا تعین کرنے کے بعد شاک آبزربر اسپرنگ کی طرح باہر نکل کر سمت بدل کر گلاس کو بچائے گا۔ ایپل کے مطابق یہ سسٹم موبائل، سمارٹ فون، ٹیبلیٹ، کمپیوٹر اور دیگر برقی ڈیوائسز میں نصب کیا جاسکتا ہے۔
