کیلیفورنیا: (ویب ڈیسک) واٹس ایپ بند کرنے کی ڈیڈ لائن جاری، اب ان سمارٹ فونز پر واٹس ایپ نہیں چلے گی، پیغام رسانی کی مقبول ایپلی کیشن واٹس ایپ نے بڑا اعلان کردیا۔
پیغام رسانی کی سب سے بڑی ایپلی کیشن واٹس ایپ نے پرانے آپریٹنگ سسٹم والے فونز پر سروس بند کرنے کی ڈیڈ لائن دے دی۔ واٹس ایپ انتظامیہ کے مطابق یکم فروری2020 سے اینڈرائیڈ کے ورژن 2.3.7 اور اس سے پہلے والے اسمارٹ فون بشمول نوکیا ایس 40 اور آئی فون پر چلنے والے آپریٹنگ سسٹم آئی او ایس 7 یا اس سے پرانے سسٹم والی ڈیوائسز پر واٹس ایپ کام نہیں کرے گی۔
دنیا بھر میں پیغام رسانی کی مقبول ترین ایپ استعمال کرنے والوں کی مجموعی تعداد 50 کروڑ کے لگ بھگ ہے اور دن بدن واٹس ایپ کے استعمال کرنے والوں کی تعداد میں اضافہ ہورہا ہے۔ جبکہ گوگل کے فراہم کردہ اعداد و شمار کے مطابق دنیا بھر میں 60 لاکھ افراد پرانے آپریٹنگ سسٹم والے موبائل فونز، ٹیبلٹ اور دیگر اینڈرائیڈ ڈیوائسز استعمال کررہے ہیں۔
