اوسلو: (نیٹ نیوز) ناروے میں ایک جدید ترین ماحول دوست عمارت بنائی گئی ہے جو اپنے استعمال سے دگنی بجلی تیار کرتی ہے۔
اس کی ڈیزائننگ خاص انداز سے کی گئی ہے جو سورج کی روشنی کو بھرپور طریقے سے جمع کرتی ہے۔ اس منفرد عمارت کی چھت پینٹاگون (پانچ پہلو) شکل کی ہے جس پر تین ہزار مربع میٹر وسیع شمسی (سولر پینل) لگے ہیں۔
یہ پینل سالانہ 5 لاکھ کلو واٹ کی بجلی بناتے ہیں جو عمارت کی روزمرہ ضرورت سے دگنا ہے۔ اس عمارت کو سنوایٹا کمپنی نے ڈیزائن کیا ہے اور عمارت کو ‘براتورکایا’ کا نام دیا گیا ہے۔
یہ عمارت ناروے کے شہر ٹرونڈائیم میں قائم کی گئی ہے اور اس کی بنیاد میں بجلی گھر بنایا گیا ہے جو شمسی توانائی کو جمع کرتا ہے اور پوری عمارت تجارتی اور دفاتر کیلئے بنائی گئی ہے۔
اسے یورپ کی سب سے مثبت توانائی والی عمارت قرار دیا گیا ہے۔ اس ماحول دوست اور پائیدار عمارت میں ایک جانب انسولیشن کا عمدہ نظام ہے اور دوسری جانب وینٹی لیشن میں حرارت کو دوبارہ استعمال کرنے کا عمدہ نظام بنایا گیا ہے۔
عمارت ٹھنڈی رکھنے کیلئے ایک پمپ لگایا گیا ہے جو قریبی سمندر سے پانی کھینچتا ہے اور عمارت کو ٹھنڈا رکھتا ہے۔ چھت پر جمع ہونے والا بارش کا پانی بیت الخلا میں استعمال کیا جاتا ہے۔
اس میں لگے بلب صرف اس وقت جلتے ہیں جب کوئی کمرے میں موجود ہو اور ایک جدید نظام بجلی کے استعمال کو کنٹرول کرتا ہے۔
