ریاض: (ویب ڈیسک) سعودی عرب نے امریکی ارب پتی ایلون مسک کی سیٹلائٹ انٹرنیٹ کمپنی "اسٹارلنک" کو ملک میں اپنی سرگرمیاں شروع کرنے کی منظوری دے دی ہے، یہ کمپنی فضائی اور بحری نیویگیشن کے شعبوں میں خدمات فراہم کرے گی۔
ایلون مسک نے یہ بات سعودی-امریکی سرمایہ کاری فورم کے دوران مصنوعی ذہانت کے موضوع پر ایک نشست میں بتائی، انھوں نے کہا "میں سعودی عرب کا شکریہ ادا کرتا ہوں کہ اس نے سٹارلنک کو نیویگیشن اور ہوا بازی کے لیے استعمال کرنے کی اجازت دی۔"
"سٹارلنک" ایلون مسک کی ملکیتی کمپنی "سپیس ایکس" کا ایک منصوبہ ہے، جو دنیا کا سب سے بڑا سیٹلائٹ نیٹ ورک چلا رہی ہے، اور اس وقت اس کے 7,000 سے زیادہ چھوٹے سیارچے زمین کے نچلے مدار میں گردش کر رہے ہیں۔
یہ سیٹلائٹ انٹرنیٹ نظام ان علاقوں میں تیز رفتار انٹرنیٹ فراہم کرنے کے لیے بنایا گیا ہے جہاں زمینی بنیادی ڈھانچے کی کمی ہے، جیسے دیہی، صحرائی یا سمندری علاقے۔
واضح رہے کہ ابھی تک سٹارلنک کو صرف بحری اور فضائی شعبوں میں کام کرنے کی سرکاری منظوری ملی ہے، تاہم، عام رہائشی یا تجارتی صارفین کے لیے سروس کی دستیابی کی کوئی حتمی تاریخ طے نہیں کی گئی۔
