استنبول: (ویب ڈیسک) ترک شہری نے طلاق کے عجیب و غریب معاہدے میں اپنی اہلیہ کو 2 بلیوں کی دیکھ بھال کیلئے ہر 3 ماہ بعد 10 ہزار لیرا ادا کرنے پر رضامندی ظاہر کر دی۔
غیر ملکی خبر ایجنسی کے مطابق استنبول کے رہائشی بوغرا بی نے اپنی اہلیہ ایزگی بی سے باہمی رضامندی کے ساتھ طلاق کیلئے درخواست دائر کی تھی، تاہم اس طلاق میں دلچسپ بات یہ ہے کہ دونوں فریقین نے ایک دوسرے سے کسی قسم کا مالی معاوضہ یا گزر بسر الاؤنس طلب نہیں کیا۔
فریقین نے طلاق کے کاغذات میں ایک منفرد شق شامل کی جو مستقبل میں پالتو جانور رکھنے والے جوڑوں کے مقدمات کیلئے ایک مثال بن سکتی ہے، طلاق نامے میں طے پایا ہے کہ بوغرا بی کی ملکیت میں موجود 2 بلیاں ایزگی بی کے پاس رہیں گی، وہ ہر 3 ماہ بعد بلیوں کی نگہداشت کے اخراجات کیلئے 10 ہزار لیرا ادا کریں گے۔
ترکیہ میں اس منفرد معاہدے کو پہلے ہی ’الاؤنس کی نئی قسم‘ قرار دیا جا رہا ہے جو طلاق کے بعد پالتو جانوروں کی مالی کفالت سے متعلق مقدمات کیلئے ایک نئی قانونی نظیر بن سکتا ہے۔
