نئی دہلی (ویب ڈیسک) بھارتی میڈیا کے مطابق وزارت داخلہ نے تما م ریاستوں کے پولیس سربراہوں کو خط لکھ کر آگاہ کیا کہ وزیر اعظم نریندر مودی کو نا معلوم خطرہ لاحق ہو گیا ہے ۔
قومی سلامتی کونسل نے وزیر اعظم کی حفاظت سے متعلق مختلف اداروں کو بتایا ہے کہ بھارت کی سب سے بڑی سیاسی جماعت کی قیادت چونکہ مودی کے ہاتھوں میں ہے اسی لئے 2019 کے عام انتخابات کے لئے وہ سب سے اہم ہدف ہیں، لہٰذا انہیں غیر ضروری نقل و حمل اور ہجوم سے دور رہنے کا مشورہ دیا گیا ہے۔
وزارت داخلہ نے مودی کی سکیورٹی کے حوالے سے نئے حفاظتی ضوابط جاری کئے ہیں جس کے تحت کسی کو بھی مودی کے قریب آنے کی اجازت نہیں ہو گی یہاں تک کہ وزراء اور پولیس افسران بھی مودی کے انتہائی قریب نہیں آسکیں گے۔
مودی کی قریبی حفاظتی ٹیم کو بھی ان کے آس پاس غیر ضروری افراد کی موجودگی کا خیال رکھنے کے لئے خاص ہدایت جاری کی گئی ہے ۔ وزارت داخلہ نے کہا ہے کہ مودی کے عوامی رابطوں کو مزید کم کرنے کی ضرورت ہے ۔ مودی کے ساتھ چلنے والی کمانڈوز کی حفاظتی ٹیم کے ارکان کی تعداد میں اضافہ کیا جائے گا۔ پولیس نے کہاکہ ہم وزیر اعظم کو ہدایت تو نہیں کر سکتے مگر ان سے عوامی مصروفیات کے بارے میں تھوڑا محتاط رہنے کی درخواست ضرور کی ہے ۔
