ٹیکساس: (ویب ڈیسک) ٹیکساس میں 11 سالہ لڑکی نے ساتھی طلبہ کے طعنوں سے دلبرداشتہ ہوکر اپنی زندگی کا خاتمہ کرلیا۔
عالمی میڈیا کی رپورٹ کے مطابق خودکشی کرنے والی بچی کی والدہ نے بتایا کہ بیٹی جو سیلین روہو کو ’’امیگریشن اسٹیٹس‘‘کی بنیاد پر تضحیک کا نشانہ بنایا جاتا تھا، جو سیلین کی والدہ، ماربیلا کاررانزا، نے بتایا کہ اپنی بیٹی کو گھر پر بے ہوش حالت میں پایا تھا اور اُسے فوری طور پر میڈیکل سٹی آف ڈلاس منتقل کیا لیکن وہ جانبر نہ ہوسکی۔
والدہ نے بتایا کہ سکول میں سب بیٹی کو کہتے تھے امیگریشن کو فون کر کے تمہارے والدین کے بارے میں بتائیں گے اور پولیس انہیں لے جائے گی، پھر تم اکیلی رہ جاؤ گی، ماربیلا نے الزام لگایا کہ سکول انتظامیہ کو ان باتوں کی بارہا شکایتیں کیں لیکن کوئی کارروائی نہیں کی گئی۔
والدہ ماربیلا نے عالمی میڈیا سے گفتگو کرتے ہوئے مزید بتایا کہ میری بیٹی ہر ہفتے سکول کے کونسلر کے پاس جا کر اپنے مسائل بتاتی تھی لیکن سکول انتظامیہ نے غفلت کا مظاہرہ کیا، پولیس نے طالبہ کی موت کی تحقیقات شروع کر دی ہیں۔
