کیٹو: (دنیا نیوز) ایکواڈور کی جیل میں ہنگامہ آرائی سے 14 افراد ہلاک جبکہ درجنوں زخمی ہوگئے۔
خبر ایجنسی کے مطابق سکیورٹی فورسز کی قیدیوں سے جھڑپیں ہوئیں، متعدد پولیس افسروں کو اغوا کر لیا گیا، سیکڑوں قیدی مفرور ہوگئے، تصادم میں جیل کا ایک حصہ بھی گر گیا۔
میڈیا رپورٹ میں مزید بتایا گیا ہے کہ دارالحکومت کیٹو کی پولیس کا کہنا ہے کہ ہلاک ہونے والوں میں جیل کا ایک گارڈ بھی شامل ہے، ہنگامہ آرائی میں 14 افراد زخمی اور کچھ قیدی فرار ہو گئے تاہم فرار ہونے والے قیدیوں میں سے 13 کو دوبارہ گرفتار کر لیا گیا۔
علاقائی پولیس چیف نے بتایا کہ قیدیوں نے جیل کا محافظ قتل کرنے کے علاوہ کئی پولیس افسران کو یرغمال بنا لیا، صورتحال قابو میں لانے کے لئے اضافی سکیورٹی فورسز طلب کر لی گئی۔
واضح رہے ایکواڈور کی جیل بالخصوص گویاکیل لٹورل میں ہنگامہ آرائی اور فسادات کے واقعات رونما ہوتے رہتے ہیں، اس سے قبل بھی ایکواڈور کی جیلوں میں کئی بار ہنگامہ آرائی کے واقعات میں درجنوں افراد ہلاک ہوئے ہیں۔
