دہلی: (دنیا نیوز) سکھوں کی عالمی سطح پر ٹارگٹ کلنگ میں ملوث بھارتی مودی سرکار کا دہشتگرد نیٹ ورک بے نقاب ہوگیا۔
بھارتی وزیراعظم نریندر مودی ہندوتوا نظریے کے تحت سرحد پار دہشت گردی اور ٹارگٹ کلنگ میں ملوث ہیں، انتہا پسند مودی حکومت کی سرپرستی میں بیرون ملک سکھوں کے قتل عام کی مذموم سازش ناکام اور بے نقاب ہو گئی۔
عالمی جریدے دی گارڈین کے مطابق کینیڈا نے ہائی پروفائل ٹارگٹ کلنگ میں ملوث ہندوستانی گروہ بشنوئی گینگ کو دہشت گرد قرار دے دیا، لارنس بشنوئی کا مجرمانہ نیٹ ورک بیرون ملک ہائی پروفائل ٹارگٹ کلنگ تک پھیل چکا ہے۔
رپورٹ میں بتایا گیا ہے کہ کینیڈین حکومت کے مطابق بشنوئی گینگ معروف سکھ کارکن ہردیپ سنگھ نجر کے قتل میں ملوث ہے، ہندوستانی بشنوئی گینگ تارکین وطن سے بھتہ خوری، ڈرانے دھمکانے اور قتل میں ملوث ہے اور بھارتی حکومت سے مبینہ روابط رکھتا ہے۔
دی گارڈین کی رپورٹ کے مطابق کینیڈین حکام کا کہنا ہے کہ بھارت نے بشنوئی گینگ کی مدد سے نجر کے قتل کی منصوبہ بندی کی اور حکم دیا۔
دی انڈین ایکسپریس کے مطابق پبلک سیفٹی کے وزیر گیری آنند سنگھری نے کہا کہ دہشت گرد تنظیم کی نامزدگی سے اثاثے ضبط کرنے اور جرائم کا مقابلہ کرنے میں مدد ملے گی۔
واضح رہے کہ بشنوئی گینگ کو دہشت گرد تنظیم قرار دینے اور بھتہ خوری پر بات کرنے والے ریڈیو سٹیشن پر بھی حملہ ہوا ہے، پنجابی، ہندی ریڈیو سٹیشن پر 29 ستمبر کی درمیانی شب فائرنگ ہوئی۔
کینیڈین پولیس کا کہنا ہے کہ فائرنگ سمیت دیگر وارداتوں کے کیسز مبینہ طور پر لارنس بشنوئی گینگ سے جُڑے ہیں۔
درندہ صفت مودی آمرانہ طرز حکمرانی برقرار رکھنے کے لیے سمندر پار بھی اقلیتوں کی آواز خاموش کرنے میں مصروف ہے، شرپسند مودی امن کے بجائے عالمی سطح پر ریاستی دہشت گردی کو فروغ دے رہا ہے۔
