واشنگٹن: (ویب ڈیسک) امریکی وزیر خزانہ اسکاٹ بیسنٹ کا کہنا ہے کہ چین نے ٹِک ٹاک ٹرانسفر ڈیل کی منظوری دے دی ہے۔
بین الاقوامی میڈیا رپورٹس کے مطابق اسکاٹ بیسنٹ نے کہا کہ چین نے مختصر ویڈیو ایپ TikTok کے لیے منتقلی کے معاہدے کی منظوری دے دی ہے اور وہ آنے والے ہفتوں اور مہینوں میں اس حوالے سے آگے بڑھنے کی توقع رکھتے ہیں۔
بیسنٹ نے امریکی صدر ڈونلڈ ٹرمپ کی چینی رہنما شی جن پنگ کے ساتھ ملاقات کے بعد فاکس بزنس نیٹ ورک کے پروگرام مارننگز ود ماریا کو بتایا کہ "کوالالمپور میں، ہم نے چینی منظوری حاصل کرنے کے سلسلے میں ٹک ٹاک معاہدے کو حتمی شکل دی اور میں توقع کروں گا کہ یہ آنے والے ہفتوں اور مہینوں میں آگے بڑھے گا اور ہم آخر کار اس کا حل دیکھیں گے۔
گزشتہ روز چین کی وزارت تجارت نے بیان میں کہا تھا کہ ان کا ملک امریکا کے ساتھ ٹک ٹاک سے متعلق معاملات کو مناسب طریقے سے ہینڈل کرے گا۔
ایک چینی ترجمان نے مزید کہا کہ چینی فریق ٹک ٹاک سے متعلق مسائل کو مناسب طریقے سے حل کرنے کے لئے امریکی فریق کے ساتھ مل کر کام کرے گا۔
رواں سال 25 ستمبر کو امریکی صدر ڈونلڈ ٹرمپ نے ٹک ٹاک سے متعلق ایگزیکٹو آرڈر پر دستخط کئے تھے، اس معاہدے کی مالیت 14 ارب ڈالر ہوگی، اس موقع پر صدر ٹرمپ نے کہا کہ امریکی سرمایہ کار ٹک ٹاک کی ملکیت سنبھال رہے ہیں، چینی صدر شی جن پنگ نے منظوری کے معاملے میں شاندار کردار ادا کیا۔
امریکی نائب صدر کا کہنا تھا کہ ٹک ٹاک کو اب پروپیگنڈے کے لیے استعمال نہیں کیا جاسکتا، ٹاک ٹاک کو امریکیوں کے لیے محفوظ کردیا گیا ہے۔
