کیف: (دنیا نیوز) یوکرین کے صدر ولادیمیر زیلنسکی نے یہ واضح کیا ہے کہ وہ امریکی صدر ڈونلڈ ٹرمپ کے امن منصوبے کے ساتھ آگے بڑھنے کیلئے تیار ہیں۔
برطانوی خبر ایجنسی کے مطابق اپنے ایک بیان میں یوکرینی صدر ولادیمیر زیلنسکی نے کہا کہ ٹرمپ کے امن منصوبے میں چند اختلافی نکات پر امریکا اور یورپی اتحادیوں سے بات چیت ہوگی، صدر زیلنسکی نے یورپی رہنماؤں پر زور دیا کہ وہ یوکرین میں ری ایشورنس فورس تعینات کرنے کیلئے ایک واضح فریم ورک تیار کریں۔
زیلنسکی نے کہا کہ یورپ کو اس وقت تک یوکرین کی حمایت جاری رکھنی چاہیے جب تک ماسکو جنگ ختم کرنے کی کوئی حقیقی خواہش ظاہر نہیں کرتا۔
یاد رہے کہ امریکی صدر نے یوکرین کو امن معاہدہ قبول کرنے کیلئے 27 نومبر کی ڈیڈ لائن دے رکھی ہے، روس نے بھی یوکرین سے جنگ بندی کیلئے امریکی امن منصوبے کی حمایت کر رکھی ہے، صدر پیوٹن خبردار کر چکے ہیں کہ یوکرین کی جانب سے معاہدے کو مسترد کیے جانے کی صورت میں وہ مزید علاقوں پر قبضہ کرسکتے ہیں۔
