کراچی: (دنیا نیوز) بوم بوم شاہد آفریدی کہتے ہیں کہ آسٹریلیا کے خلاف ٹیسٹ سیریز میں محمد حفیظ کی اچانک انٹری نے انہیں بھی حیران کر دیا، سابق کپتان کا کہنا تھا کہ کہ اگر مسلسل پرفارم کرنے والے فواد عالم کو نمائندگی کا چانس نہیں دینا تو ڈومیسٹک کرکٹ بند کر دی جائے۔
کراچی میں میڈیا سے گفتگو کرتے ہوئے قومی کرکٹ ٹیم کے سابق کپتان شاہد خان آفریدی کا کہنا تھا کہ ایشیا کپ کے حوالے سے امیدیں بہت تھیں لیکن ٹیم کی پرفارمنس پر حیرانی ہوئی جب کہ ٹیسٹ ٹیم کے حوالے سے سلیکشن کمیٹی کے فیصلوں پربھی حیران ہوں۔
سابق آل راؤنڈرشاہد آفریدی نے کہا کہ پاک بھارت سیریزکا معاہدہ پورا ہونا چاہیے، کرکٹ اب کمرشل بن چکی ہے، ہرملک چاہتا ہے وہاں لیگ ہو، ورلڈکپ کے لئے سرفراز کو کپتان ہی رہنا چاہئے جب کہ فواد عالم اچھا کھلاڑی ہے اس کو ٹیم میں نہ لینا سمجھ سے باہر ہے۔
