شارجہ: (ویب ڈیسک) نیپال کرکٹ ٹیم نے 2 بار کے عالمی چیمپئن ویسٹ انڈیز کو ٹی 20 میچ میں شکست دے کر تاریخی فتح حاصل کر لی۔
نیپال نے شارجہ میں 3 میچز کی سیریز کے پہلے ٹی 20 میں ویسٹ انڈیز کو 19 رنز سے شکست دے کر انٹرنیشنل کرکٹ میں کسی بھی فل ممبر ٹیم کے خلاف اپنی پہلی کامیابی حاصل کی۔
شارجہ میں کھیلے گئے سیریز کے پہلے میچ میں ویسٹ انڈیز نے ٹاس جیت کر نیپال کو بیٹنگ کی دعوت دی، نیپال نے مقررہ 20 اوورز میں 8 وکٹوں کے نقصان پر148 رنز بنائے، روہت 38 اور کوشل ملا 30 رنز کے ساتھ نمایاں رہے۔
ہدف کے تعاقب میں ویسٹ انڈیز کی ٹیم نے 20 اوورز میں 9 وکٹوں پر 129 رنز بنائے، عامر جانگو اور ایلن 19،19 رنز بناکر نمایاں رہے۔
یاد رہے کہ اس سے قبل 2014 میں نیپال نے افغانستان کو ایک ٹی 20 میچ میں ہرایا تھا، لیکن اس وقت افغانستان ایسوسی ایٹ رکن تھا۔
