اسلام آباد: (دنیا نیوز) اسلام آباد میں امریکی دفاعی اتاشی کی گاڑی کی ٹکر سے نوجوان کی ہلاکت پر پاکستان اور امریکا میں پیدا ہونے والا تناؤ کم نہ ہو سکا۔ دونوں ملکوں کے درمیان مذاکرات کا دور ناکام رہا۔ دونوں ممالک سفارتکاروں پر عائد پابندیاں نہ ہٹانے پر بضد ہیں۔
ٹریفک حادثے میں پاکستانی نوجوان کی ہلاکت کے معاملے پر پاکستان اپنے موقف پر ڈٹ گیا ہے اور اس حوالے سے قائم مقام نائب امریکی وزیرِ خارجہ ایلس ویلز کو دو ٹوک پیغام دیدیا گیا ہے۔ اس وجہ سے دونوں ممالک کے درمیان تعلقات میں تناؤ برقرار ہے۔ دونوں ممالک نے سفارتکاروں پر عائد پابندیاں ہٹانے سے گریز کا اظہار کیا ہے۔
ذرائع کے مطابق سیکرٹری خارجہ تہمینہ جنجوعہ نے قائم مقام نائب امریکی وزیر خارجہ ایلس ویلز سے ملاقات میں اپنا موقف واضح کرتے ہوئے کہا کہ ویانا کنونشن اور ملکی قوانین کے تحت کارروائی کی جائے گی۔
پاکستان نے امریکی سفارت کاروں کی نقل و حرکت سے متعلق سکیورٹی وجوہات سے آگاہ کیا جبکہ امریکا میں پاکستانی سفارت کاروں پر سفری پابندیاں نہ لگانے کا مطالبہ کیا۔
دنیا نیوز کے ذرائع کے مطابق مذاکرات کے باوجود پاک امریکا تناؤ میں کوئی کمی نہیں آ سکی ہے۔ دونوں ممالک سفارت کاروں کی نقل و حرکت محدود کرنے کے حوالے سے اپنے موقف پر قائم ہیں۔ تناؤ کے خاتمے کے حوالے سے بات چیت جاری رکھنے کا فیصلہ کیا گیا ہے۔
