لاہور: (دنیا نیوز) پاکستان سمیت دنیا بھر میں مسیحی برادری نے کرسمس کا تہوار مذہبی جوش و جذبے کے ساتھ منایا۔
کرسمس کے موقع پر مسیحی برادری نے ملک بھر کے تمام گرجا گھروں کو برقی قمقموں سے سجا گیا تھا، کرسمس پر ملک کے چھوٹے بڑے شہروں میں مسیحی برادری نے گلی کوچوں کی سجانے کے ساتھ گھروں میں کرسمس ٹری بھی سجائے۔
دن کے آغاز پر گرجا گھروں میں دعائیہ تقریبات منعقد کی گئیں، جس میں پاکستان کی ترقی و خوشحالی کیلئے خصوصی دعائیں مانگی گئیں۔
مسیحی برادری کا کرسمس کے خاص موقع پر کہنا ہے کہ حضرت عیسیٰ علیہ اسلام نے محبت اور بھائی چارے کا جو درس دیا اسے ہر سو پھیلایا جائے گا، کرسمس کا تہوار اپنے ساتھ خوشی ، روشنی اور امن کا پیغام سمیٹ کر لاتا ہے، سال بھر اس تہوار کا انتظار کرتے ہیں۔
وفاقی دارالحکومت اسلام آباد میں بھی مسیحی برادری نے خوب تیاری کی، سیکٹر ایف سیون میں مسیحی برادری نے کرسمس کو خوش آمدید کہنے کیلئے سجاوٹ کا بھرپور انتظام کیا گیا تھا، برقی قمقموں، رنگ برنگی بیلز سے مسیحی برادری کی خوشی جھلک رہی تھی۔
صدر مملکت ڈاکٹر عارف علوی
دوسری جانب اپنے پیغام میں صدر مملکت ڈاکٹر عارف علو ی نے کہا ہے کہ کرسمس کے پرمسرت موقع پر مسیحی برادری کو دل کی گہرائیوں سے مبارکباد پیش کرتا ہوں۔
صدر مملکت نے کہا کہ حضرت عیسیٰ علیہ السلام کی محبت، ہمدردی اور امن کی تعلیمات ہمارے لئے مشعل راہ ہیں، مذاہب اور ثقافتوں کا تنوع پاکستان کیلئے باعث استحکام ہے، مسیحی برادری نے ملک کی سماجی اور اقتصادی ترقی میں نمایاں کردار ادا کیا ہے۔
انہوں نے کہا کہ پاکستان میں اقلیتوں کو تمام سیاسی، معاشی اور سماجی حقوق حاصل ہیں، ہم ملک میں امن، رواداری اور ہم آہنگی کے فروغ کیلئے مسیحی برادری کی جانب سے کی جانے والی قابل ستائش خدمات کا اعتراف کرتے ہیں۔
ڈاکٹر عارف علوی کا کہنا تھا کہ میں آپ کو یقین دلاتا ہوں کہ حکومت پاکستان ملک میں تمام مذہبی اقلیتوں کے حقوق کے تحفظ کو یقینی بنانے کیلئے پرعزم ہے، مجھے یہ کہتے ہوئے فخر محسوس ہوتا ہے کہ ریاست کے تمام ادارے اقلیتوں کے حقوق کا مکمل تحفظ کرتے ہیں۔
نگران وزیر اعظم انوار الحق کاکڑ
ادھر نگران وزیراعظم انوارالحق کاکڑ نے کرسمس کے موقع پر اپنے پیغام میں کہا کہ کرسمس، محبت، اخوت، برداشت اور ایثار کا نام ہے، قوم کی جانب سے مسیحی بہن بھائیوں کو کرسمس کی خوشیاں مبارک ہوں۔
انوار الحق کاکڑ کا کہنا تھا کہ کچھ برسوں میں عالمی سطح پر مذہبی عدم برداشت سے معاشرے میں بگاڑ کی صورتحال رہی، حضرت عیسیٰ علیہ السلام کے انسانی ہمدردی، محبت، رواداری کے پیغام پر عمل کی ضرورت ہے۔
