اسلام آباد: (دنیا نیوز) وزیر مملکت برائے داخلہ طلال چودھری نے کہا کہ اگر کسی نے ریاست پر حملہ آور ہونے کی جرات کی تو جواب پہلے سے بھی سخت ہوگا۔
وزیراعلیٰ خیبر پختونخوا علی امین گنڈاپور کے بیان پر اپنے ردعمل میں وزیر مملکت برائے داخلہ طلال چودھری نے کہا کہ سیاسی جماعتوں کا طرز عمل بھی سیاسی ہونا چاہئے، تحریک انصاف نے بار بار سیاسی غلطیاں کیں۔
طلال چودھری نے کہا کہ پی ٹی آئی نے پہلے استعفے دیئے، پھر اسمبلیاں توڑیں اور اب اپنی نالائقی کی وجہ سے مخصوص نشستوں سے محرم ہوئے، مخصوص سیٹیں دوسری جماعتوں کو PTI کی اپنی غلطی کی وجہ سے ملیں۔
یہ بھی پڑھیں: علی امین گنڈا پور نے ریاست کو خیبر پختونخوا حکومت گرانے کا چیلنج دے دیا
انہوں نے کہا کہ آج پی ٹی آئی کو جن حالات کا سامنا ہے اس کی واحد وجہ ان کی یہی غیر سیاسی سوچ ہے، علی امین گنڈاپور پہلے بھی اسلام آباد پر چڑھائی کی کئی کوشش کر چکے ہیں، ہر بار ریاست نے آئین و قانون کے تحت آپ کا راستہ روکا۔
طلال چودھری نے کہا کہ جن صاحب کے اپنے صوبے میں پولیس محفوظ نہ ہو، جن کی حکومت دہشت گردوں سے ڈرتی ہو، وہ صرف ٹی وی پر بڑھکیں مار سکتے ہیں، صوبے میں اگر پی ٹی آئی کی لگاتار تیسری حکومت نہ ہوتی تو صوبے میں دہشتگردی نہ ہوتی۔
انہوں نے کہا کہ سیاسی اختلاف کا حق سب کو ہے لیکن ریاستی اداروں پر حملہ کسی کو بھی قبول نہیں، جو سیاست نفرت، انتشار اور بدامنی سے شروع ہو، اس کا انجام ہمیشہ پچھتاوا، تنہائی اور رسوائی ہوتا ہے۔
