اسلام آباد:(دنیا نیوز) وفاقی وزیر منصوبہ بندی احسن اقبال نے کہا ہے کہ صوبائی حکومتوں کے ساتھ ملکر زرعی زمینوں کے تحفظ کے لیے پالیسی تشکیل دی جائے گی۔
وفاقی دارالحکومت میں احسن اقبال کی زیر صدارت زرعی زمین کو رہائشی سوسائٹیز میں تبدیل کرنے سے متعلق کمیٹی کا اجلاس ہوا، اجلاس میں وفاقی و صوبائی اداروں کے اعلیٰ افسران، سی ڈی اے اور متعلقہ وزارتوں کے نمائندے شریک ہوئے۔
شرکا سے گفتگو کرتے ہوئے وفاقی وزیر کا کہنا تھا کہ پاکستان میں زرعی زمینوں کی تیزی سے کمی تشویشناک حد تک بڑھ گئی، زرعی زمینوں کو برق رفتاری سے ہاؤسنگ سوسائٹیز میں تبدیل کرنے کا سلسلہ تسویشناک ہے، آنے والی نسل کو خوراک مل سکے گی؟
انہوں نے کہا کہ فوڈ سکیورٹی شدید خطرے میں ہے، اسلام آباد میں فوری طور سے عمودی تعمیرات کی طرف آغاز کیا جائے، درختوں کی کٹائی پر سخت قوانین کی ضرورت ہے، ماحول بچانا سب کی ذمہ داری ہے، بیس سالوں میں کتنی زرعی زمین رہائشی سکیموں کی نذر ہوئی؟
احسن اقبال کا کہنا تھا کہ صوبائی حکومتیں ڈیٹا اکٹھا کریں، متعلقہ اداروں کو وفاقی وزیر کی ہدایت اربن پلاننگ کے بغیر پھیلتے شہروں میں بنیادی سہولتوں کا فقدان ، بحران پیدا کر رہا ہے ، زرعی زمین کے بےدریغ استعمال سے ہم اپنی خوراک کا مستقبل بیچ رہے ہیں۔
وفاقی وزیر نے مزید کہا کہ پاکستان میں ماحولیاتی توازن بگڑنے لگا ہے ، ہاؤسنگ کی لالچ زرعی زمین نگل رہی ہے، قانون سازی اور نیشنل فریم ورک کے بغیر اربن ڈویلپمنٹ ناگزیر ہے، صوبائی حکومتوں کے ساتھ ملکر زرعی زمینوں کے تحفظ کے لیے پالیسی تشکیل دی جائے گی۔
