لاہور: (دنیا نیوز) کوہ پیمائی میں پاکستان کا پرچم بلند کرنے والے شہروز کاشف تاحال حکومتی انعام کے منتظر ہیں۔
شہروز کاشف 8 ہزار میٹر بلند تمام 14 چوٹیاں سر کرنے والے پاکستان کے کم عمر ترین کوہ پیما ہیں۔
شہروز کاشف نے کہا ہے کہ میری حکومت نے مجھے کیش پرائز دینے کا کئی مرتبہ وعدہ کیا لیکن سب بھول گئے، میں نے اپنی زمین اور گاڑی بیچی لیکن میں کوہ پیمائی کی وجہ سے اب مقروض ہوں۔
ان کا کہنا ہے کہ ملک کا نام روشن کرنے کے لیے میرے لگ بھگ 4 کروڑ روپے لگے ہیں، میری کمر کا خطرناک آپریشن ہوا، میری کمر میں راڈز ہیں، مجھے اب چلنے پھرنے میں دشواری ہے۔
شہروز کاشف نے مزید کہا ہے کہ میرے کسی نے میڈیکل کے بلز کی ذمہ داری تک نہیں اٹھائی، کوئی اس شخص کے ساتھ ایسا کیسے کرسکتا ہے جس نے 8 ہزار سے بلند 14 چوٹیاں سر کی ہیں، اگر ایسا ہی رویہ رہا تو میں پھر بیرون ملک اپنے لیے کچھ سوچنے پر مجبور ہوں گا۔
