لاہور(نیٹ نیوز)جوان اور کم عمر دکھائی دینا ہر شخص کی خواہش ہوتی ہے ۔ ماہرین کا کہنا ہے کہ اگر آپ بڑھاپے سے دور رہنا چاہتے ہیں تو دھوپ میں کم سے کم وقت گزاریں۔
یہ تحقیق اس وقت سامنے آئی جب امریکہ کے شہر بوسٹن میں 231 خواتین سے سوالات کیے گئے ۔ ان خواتین سے انکے طرز زندگی کے متعلق پوچھا گیا جس سے پتہ چلا کہ وہ کتنا وقت دھوپ میں گزارتی ہیں۔ نتیجے کے مطابق وہ خواتین جو دھوپ میں کم وقت گزارتی تھیں یا دھوپ میں نکلتے ہوئے احتیاطی تدابیر اختیار کرتی تھیں ان کی جلد پر نہ صرف جھریاں کم تھیں بلکہ انکی جلد خوبصورت اور جوان بھی تھی۔
ماہرین نے بتایا کہ دھوپ میں زیادہ وقت گزارنے یا دھوپ کے براہ راست جلد پر پڑنے سے جلد کے اندرونی خلیات تباہ ہونے لگتے ہیں اور یوں جلد بوسیدہ ہوجاتی ہے ۔انہوں نے بتایا دھوپ کے اثرات کچھ اقسام کی جلد پر زیادہ شدت سے اثر انداز ہوتے ہیں ،ڈرماٹولوجی پروفیسر کم بال کا کہنا ہے کہ چونکہ احتیاط علاج سے زیادہ ضروری ہے ، چنانچہ خواتین کو روز اپنی جلد کو دھوپ سے بچاؤ کے اقدامات کرنے چاہئیں۔
انہوں نے بتایا وہ پچھلے 50 سال سے دھوپ سے بچاؤ کیلئے سن سکرین کا استعمال کرتی آرہی ہیں اور اس معمول کو ایک دن کیلئے بھی نہیں چھوڑا۔ انہوں نے اس تصور کی بھی نفی کردی کہ پانی کے زیادہ استعمال سے ہم اپنی جلد کو بہتر بنا سکتے ہیں۔
