کیلیفورنیا(نیٹ نیوز) موبائل فون کی آمد سے قبل وائرلیس اور واکی ٹاکی بہت اہم تصور کئے جاتے تھے اور اب ان ہی کی یاد میں ایپل کمپنی نے ایپل واچ کیلئے واکی ٹاکی ایپ پیش کردی ہے۔
اس ایپ کے ذریعے دو افراد اپنی ایپل ایپ پر ایک بٹن دبا کر ایک دوسرے سے بات کرسکیں گے۔ یہ ایپ واچ او ایس فائیو نامی نئے ایپل آپریٹنگ سسٹم پر چلتی ہے جس میں واٹس ایپ کی طرح رابطہ فہرست میں شامل دیگر دوستوں کو بھی اپنا وائس میسج بھیج سکتے ہیں۔
اس ایپ کو ’’واکی ٹاکی‘‘ کا ہی نام دیا گیا ہے۔ ایپل کے چیف آپریٹنگ آفیسر جیف ولیمز نے کہا ایپ وائی فائی اور سیلولر نیٹ ورک، دونوں پر کام کرتی ہے جبکہ اس کے ذریعے پوری دنیا سے تیزرفتار، ذاتی اور خفیہ رابطہ کیا جاسکتا ہے اس طرح فون کال کے مقابلے میں ایک بٹن دبا کر بات کرنا بہت آسان اور محفوظ طریقہ بھی ہے۔
