کیلیفورنیا: (ویب ڈیسک) سوشل میڈیا پلیٹ فارم بلیو سکائی نے ایک نیا فیچر متعارف کرا دیا جس کے تحت صارفین کو لائیو سپورٹس میچز کی نشاندہی کی جائے گی۔
ٹیکنالوجی ویب سائٹ کے مطابق اس فیچر کے تحت جب کوئی بھی میچ براہ راست نشر ہوگا تو بلیو سکائی پر بنے نشریاتی اداروں کے اکاؤنٹس کی پروفائل تصویر کے گرد ایک سرخ بارڈر اور لائیو کا لیبل ظاہر ہوگا۔
صارفین اس پروفائل تصویر پر کلک کر کے براہ راست سٹریمنگ پلیٹ فارم جیسے یوٹیوب یا ٹوئچ پر منتقل ہو سکیں گے۔
بلیوسکائی کی چیف آپریٹنگ آفیسر روز وانگ نے اس فیچر کے بارے میں بتاتے ہوئے کہا کہ اس کا مقصد صارفین کو لائیو ایونٹس دریافت کرنے میں مدد فراہم کرنا ہے نہ کہ انہیں بلیوسکائی پر ہی محدود رکھنا، انہوں نے واضح کیا کہ بلیوسکائی، ایکس کے برعکس مہنگے سٹریمنگ معاہدوں میں سرمایہ کاری نہیں کر رہا بلکہ صارفین کو بیرونی پلیٹ فارمز پر لائیو مواد دیکھنے کی سہولت فراہم کر رہا ہے۔
یہ فیچر ابتدائی طور پر این بی اے اور وی این بی اے کے اکاؤنٹس پر آزمائشی بنیادوں پر متعارف کرایا گیا ہے اور مستقبل میں دیگر اکاؤنٹس پر بھی اس کا دائرہ کار بڑھایا جائے گا۔
بلیوسکائی کا یہ اقدام کھیلوں کے شائقین کیلئے مثبت پیشرفت ہے، جو لائیو میچز کے دوران فوری ردعمل اور تبصروں کیلئے سوشل میڈیا کا رخ کرتے ہیں، یہ فیچر انہیں بلواسکائی پر لائیو ایونٹس کی بروقت معلومات فراہم کرے گا، جس سے پلیٹ فارم پر کھیلوں سے متعلق کمیونٹی کی ترقی میں مدد ملے گی۔
