دبئی: (ویب ڈیسک) متحدہ عرب امارات میں پولیس نے میٹرو اسٹیشن سے برقع پوش بھارتی شخص کو حراست میں لے لیا جو اپنی اہلیہ کی جاسوسی کے لیے برقع پہن کر اس کا پیچھا کررہا تھا۔ برقع پوش بھارتی شخص کو عدالت میں پیش کردیا گیا جہاں اسے ملک بدر کرنے کی سفارش کی گئی
عرب میڈیا کے مطابق دبئی کے میٹرو اسٹیشن پر اس وقت دلچسپ اور عجیب صورت حال دیکھنے میں آئی جب پولیس اہلکار نے ایک مشکوک برقع پوش خاتون کو تلاشی کی غرض سے روک لیا۔ اہلکار کے حکم پر خاتون نے نقاب اُلٹا تو برقع پوش کوئی عورت نہیں بلکہ ایک مرد تھا جس پر 2 ہزار جرمانہ عائد کر کے حراست میں لے لیا گیا۔
دبئی پولیس نے گرفتار بھارتی شخص کو عدالت میں پیش کر دیا جہاں اپنے اعتراف جرم میں اس شخص نے بیوی کی جاسوسی کا اقرار کرتے ہوئے بتایا کہ اپنی ہم وطن اہلیہ کی جاسوسی کرنے کے لیے میں نے خواتین کا لباس اور عبایا خریدا تھا اور اہلیہ کا پیچھا کرنے کے لیے بھیس بدلا تھا لیکن اس سے قبل کہ میں اپنی بیوی کو پکڑتا پولیس نے مجھے ہی دھرلیا۔
استغاثہ نے ملزم کو سخت سزا دینے کی اپیل کرتے ہوئے ملک بدر کرنے کی استدعا کی ہے۔ عدالت نے فریقین کے دلائل سننے کے بعد سماعت ایک ہفتے کے لیے ملتوی کردی۔
