لندن: (ویب ڈیسک) لندن پولیس کو 2 ایسے قیدیوں کی تلاش ہے جنہیں جیل انتظامیہ نے غلطی سے رہا کر دیا۔
غیر ملکی خبر رساں ادارے کے مطابق الجزائر سے تعلق رکھنے والے 24 سالہ ابراہیم قدور شریف اور 35 سالہ ولیم سمتھ کو بالترتیب 29 اکتوبر اور 3 نومبر کو لندن کی ایچ ایم پی ونزوتھ جیل سے غلطی سے رہا کیا گیا، انگلینڈ میں یہ واقعات جنسی جرائم میں ملوث ہڈش کیباٹو کی بھی غلطی سے رہائی کے 5 روز بعد پیش آئے۔
ان واقعات کے بعد وزیر انصاف ڈیوڈ لیمی پر بھی شدید تنقید کی جا رہی ہے جنہوں نے حال ہی میں اس بات کا وعدہ کیا تھا کہ ایسے واقعات کی روک تھام کیلئے اضافی سکیورٹی چیک نافذ کیے جائیں گے، اسی معاملے پر پارلیمان میں کنزرویٹو پارٹی کے ارکان نے بھی وزیر انصاف پر شدید تنقید کی۔
برطانیہ کے سرکاری اعداد و شمار کے مطابق مارچ 2025ء تک 262 قیدیوں کو غلطی سے رہا کیا گیا ہے جو گزشتہ سال کے مقابلے میں 128 فیصد اضافہ ہے۔
