برسلز: (ویب ڈیسک) صدر یورپی کمیشن نے امریکی محصولات پر سخت جوابی اقدامات کے عزم کا اظہار کیا ہے۔
عالمی میڈیا کی رپورٹ کے مطابق یورپی کمیشن کی صدر ارسلا وان ڈیر لیین نے کہا کہ یورپی یونین سے سٹیل اور ایلومینیم کی درآمدات پر امریکی محصولات مضبوط اور متناسب جوابی اقدامات کو متحرک کریں گی۔
انہوں نے یورپی سٹیل اور ایلومینیم کی برآمدات پر محصولات عائد کرنے کے امریکی فیصلے پر افسوس کا اظہار کرتے ہوئے کہا کہ محصولات کاروبار کے لئے خراب، صارفین کے لئے بدتر ہیں۔
صدر یورپی کمیشن نے کہا کہ یورپی یونین پر بلاجواز محصولات کا جواب ضرور دیا جائے گا، یورپی یونین اپنے معاشی مفادات کے تحفظ کے لئے کام کرے گی، ہم اپنے کارکنوں، کاروباروں اور صارفین کی حفاظت کریں گے۔
واضح رہے کہ امریکی صدر ڈونلڈ ٹرمپ نے پیر کو اعلان کیا کہ سٹیل اور ایلومینیم کی درآمدات پر امریکا میں داخل ہونے پر 25 فیصد محصولات کے ساتھ مشروط ہوں گے، چاہے ان کا تعلق کسی بھی ملک سے ہو۔
