لاہور: (دنیا نیوز) پاکستان کرکٹ کا بڑا نام، لٹل ماسٹر حنیف محمد کو دنیا چھوڑے 9 برس بیت گئے۔
سابق کپتان حنیف محمد نے لاتعداد ریکارڈز اور کئی اعزازات اپنے نام کئے، حنیف محمد کا نام آئی سی سی ہال آف فیم میں بھی درج ہے، پاکستان کی جانب سے پہلی ٹرپل سنچری بنانے والے حنیف محمد کو صدارتی تمغہ حسن کارکردگی سے بھی نوازا گیا۔
21 دسمبر 1934ء کو جونا گڑھ، متحدہ ہندوستان میں پیدا ہونے والے حنیف محمد کے بھائیوں وزیر محمد، رئیس محمد، مشتاق محمد اور صادق محمد نے بھی ٹیسٹ کرکٹ میں پاکستان کی نمائندگی کی، ان کی والدہ امیر بی بی بھی کھیلوں سے گہرا شغف رکھتی تھیں اور متحدہ ہندستان کی ویمن بیڈمنٹن چیمپئن بھی رہیں۔
بھارت کے خلاف 1952ء میں پہلا ٹیسٹ کھیلنے والے حنیف محمد نے 55 ٹیسٹ میچز کی 97 اننگز میں12 سنچریوں اور 15 ففٹیز کی مدد سے 3 ہزار 915 رنز سکور کئے، انہوں نے ٹیسٹ کرکٹ میں صرف دو چھکے لگائے اور ایک ٹیسٹ وکٹ بھی اپنے نام کرنے کا اعزاز پایا۔
جنوری 1958ء میں ویسٹ انڈیز کے خلاف برج ٹاون ٹیسٹ میں 337 رنز کی تاریخی اننگز کھیلی، پاکستان کی جانب سے پہلی ٹریپل سنچری جڑنے والے حنیف محمد ٹیسٹ میچ کے تقریبا پانچوں دن میدان میں رہنے والے پہلے کرکٹر بنے، ویسٹ انڈیز کی پہلی اننگز میں 579 رنزکے جواب میں 106 رنز پر سمٹ جانے والی پاکستان کو فالو آن کے بعد انہوں نے 970 منٹ تک کریز پر جم کر ناصرف یادگار اننگز کھیلی بلکہ اپنی ٹیم کو یقینی شکست سے بھی بچالیا۔
حنیف محمد نے 1959ء میں کراچی کی طرف سے کھیلتے ہوئے بہاولپور کے خلاف فرسٹ کلاس میچ میں 499 رنز کی اننگز کھیل کر ویسٹ انڈیز کے سر ڈان بریڈ مین کا ریکارڈ توڑا، ان کا ریکارڈ 1994 تک قائم رہا جسے ویسٹ انڈیز کے برائن لارا نے توڑا۔
حنیف محمد طویل علالت کے بعد 11 اگست2016 کو کراچی میں انتقال کر گئے تھے، ان کی وفات کے بعد گوگل نے اپنے ڈوڈل کے ذریعے ان کو خراج عقیدت پیش کیا تھا جبکہ وہ آئی سی سی کرکٹ ہال آف فیم میں بھی شامل ہوئے۔
اس عظیم کرکٹرکی آخری خواہش تھی کہ ان کے نام سے کرکٹ اکیڈمی قائم کی جائے جہاں سے ملک کو مستقبل کے بہترین کرکٹرز دستیاب ہوں۔
