لاہور: (ویب ڈیسک) ٹیسٹ، ون ڈے اور پھر ٹی 20 کے بعد کرکٹ کے کھیل میں ایک اور نیا دلچسپ فارمیٹ متعارف کروا دیا گیا۔
کرکٹ کی دنیا میں ایک نیا اور سنسنی خیز فارمیٹ جسے ٹیسٹ ٹوئنٹی کا نام دیا گیا ہے کو 16 اکتوبر کو متعارف کرایا گیا، کرکٹ کے اس نئے فارمیٹ کا منصوبہ بھارتی سپورٹس سرمایہ کار گورو بہیروانی نے پیش کیا، ٹیسٹ ٹوئنٹی کو کرکٹ کا چوتھا فارمیٹ قرار دیا جا رہا ہے۔
اس منصوبے کی تقریب رونمائی ایک آن لائن میٹنگ میں کی گئی جس میں ٹیسٹ ٹوئنٹی کے بانی گورو بہیروانی سمیت دیگر عہدیدار شریک ہوئے، یہ نیا فارمیٹ ٹیسٹ کرکٹ کی حکمت عملی کو ٹی 20 کی تیز رفتار اور سنسنی کے ساتھ جوڑے گا۔
اس فارمیٹ کو بین الاقوامی کرکٹ کے کئی بڑے ناموں کی حمایت حاصل ہے جن میں اے بی ڈی ویلیئرز، سر کلائیو لائیڈ اور میتھیو ہیڈن شامل ہیں۔
ٹیسٹ ٹوئنٹی کیسے کھیلا جائے گا؟
ویب سائٹ کے مطابق یہ فارمیٹ ٹیسٹ اور ٹی 20 کا بہترین امتزاج ہے،’ٹیسٹ ٹوئنٹی‘ کا ہر میچ مجموعی طور پر 80 اوورز پر مشتمل ہو گا اور ٹیسٹ کرکٹ کی طرح اس کی مجموعی طور پر 4 اننگز ہوں گی، ہر ٹیم 20 اوورز پر مشتمل 2 اننگز کھیلے گی اور ٹیسٹ میچ کی طرح پہلی اننگز کی لیڈ دوسری اننگز میں جمع ہو جائے گی۔
— AB de Villiers (@ABdeVilliers17) October 16, 2025
اس فارمیٹ میں ٹیسٹ کرکٹ کی طرح ’فالو آن‘ اور ٹی 20 کی طرح پاوور پلے بھی ہو گا، ہر ٹیم 5 بولر استعمال کر سکے گی اور ہر بولر دونوں اننگز میں مجموعی طور پر 8 اوورز کروا سکے گا۔
اس فارمیٹ میں وائیڈ اور نو بالز کے لیے ٹی 20 والے قوانین لاگو ہوں گے، یعنی فری ہٹ بھی ملے گی۔
ٹیسٹ ٹوئنٹی فارمیٹ میں تمام ممکنہ نتائج، جیت، ہار، ٹائی یا ڈرا شامل ہیں، اگر دونوں ٹیموں کے مجموعی سکور برابر ہوں تو فاتح کا فیصلہ ’سپر اوور‘ سے کیا جائے گا تاہم اگر کوئی ٹیم اپنی اننگز 5 وکٹیں ہاتھ میں رکھتے ہوئے مکمل کر لے تو وہ میچ کو ڈرا پر ختم کرنے کا اختیار رکھ سکے گی۔
فارمیٹ کا آغاز؟
ٹیسٹ ٹوئنٹی فارمیٹ کا پہلا ایونٹ جونیئر ٹیسٹ ٹوئنٹی چیمپئن شپ جنوری 2026 میں منعقد ہو گی جس میں 13 سے 19 سال کے کھلاڑی حصہ لیں گے، اس ٹورنامنٹ کا مقصد نوجوان کھلاڑیوں کے حوصلے، فیصلے کی صلاحیت اور کھیل کی سمجھ بوجھ کو پرکھنا ہے۔
ٹورنامنٹ میں 6 فرنچائزز شامل ہوں گی جس میں 3 بھارت سے جبکہ ایک دبئی، ایک لندن اور ایک امریکی شہر سے منسوب ہو گی، ہر ٹیم میں 16 کھلاڑی ہوں گے جن میں آدھے بھارتی اور آدھے دوسرے ممالک سے ہوں گے۔
