کراچی: (دنیا نیوز) کراچی میں غیر قانونی مقیم افغانیوں کے خلاف آپریشن کیا گیا، آپریشن کے دوران متعدد افراد کو گرفتار کر لیا گیا۔
شہر قائد میں غیر قانونی طور پر مقیم افغان باشندوں کے خلاف قانون نافذ کرنے والے اداروں نے بڑا آپریشن شروع کر دیا، کارروائی میں رینجرز، سی ٹی ڈی اور سہراب گوٹھ پولیس نے حصہ لیا جبکہ ڈی ایس پی اورنگزیب خٹک نے آپریشن کی قیادت کی۔
ذرائع کے مطابق کراچی کے علاقے سہراب گوٹھ میں جاری اس مشترکہ آپریشن میں اب تک متعدد مشتبہ افراد کو حراست میں لیا گیا جن سے تحقیقات کا عمل جاری ہے، آپریشن کا مقصد غیر قانونی مقیم افراد کی نشاندہی، شناختی کاغذات کی تصدیق اور امن و امان کے قیام کو یقینی بنانا ہے۔
پولیس کے اعلیٰ حکام نے بتایا کہ کارروائی قانونی رہائش کے بغیر مقیم افغان باشندوں کے خلاف قومی پالیسی کے تحت کی جا رہی ہے۔
