لاہور: (دنیا نیوز) گورنمنٹ کالج لاہور کے پرنسپل، ریڈیو کے ڈائریکٹر جنرل اور اقوام متحدہ میں پاکستان کے مستقل مندوب کے طور پر فرائض نبھانے والے نامور مزاح نگار، افسانہ نگار اور شاعر پطرس بخاری کو دنیا سے رخصت ہوئے 67 برس بیت گئے۔
پطرس بخاری یکم اکتوبر 1898ء کو پشاور میں پیدا ہوئے، ان کا اصل نام سید احمد شاہ تھا، انہوں نے گورنمنٹ کالج لاہور سے تعلیم حاصل کی اور پھر اعلیٰ تعلیم کیلئے انگلستان چلے گئے جہاں سے کیمبرج یونیورسٹی کے عمانویل کالج سے انگریزی ادب میں اول درجے میں سند حاصل کی۔
پطرس بخاری نے اپنی ادبی زندگی کا باقاعدہ آغاز سول اینڈ ملٹری گزٹ سے کیا، یکم مارچ 1947ء کو پطرس بخاری نے گورنمنٹ کالج لاہور کے پرنسپل کا عہدہ سنبھالا، جنوبی ایشیاء میں ریڈیو کے باقاعدہ قیام نے پطرس بخاری کی انتظامی اور فنکارانہ صلاحیتوں کو جِلا بخشی۔
ریڈیو میں پنجاب کے نمائندے کی حیثیت سے پطرس بخاری کو نامزد کیا گیا، انہیں یکم اگست 1949ء کو اقوام متحدہ میں پاکستان کا مستقل مندوب مقرر کیا گیا، 2003ء میں حکومت پاکستان نے پطرس بخاری کو ہلال امتیاز سے نوازا، پطرس بخاری 5 دسمبر 1958ء کو نیویارک میں وفات پا گئے۔
