اسلام آباد: (ویب ڈیسک) سپیکر قومی اسمبلی ایاز صادق نے کہا کہ بلوچستان میں بھارتی سرپرستی میں سرگرم فتنہ الہندوستان جیسے دہشتگردوں کا انجام عبرتناک ہوگا۔
سپیکر قومی اسمبلی سردار ایاز صادق نے آواران میں دہشتگردوں کے خلاف کامیاب آپریشن پر سکیورٹی فورسز کو خراج تحسین پیش کرتے ہوئے آپریشن کے دوران میجر سید رب نواز طارق کے جانی نقصان پر گہرے دکھ اور افسوس کا اظہار کیا ہے ۔
سردار ایاز صادق نے اپنے پیغام میں میجر سید رب نواز طارق کی جرات اور بہادری کو خراج عقیدت پیش کیا اور کہا کہ شہید میجر سید رب نواز طارق کی جرات اور بہادری کو قوم سلام پیش کرتی ہے، شہداء کی قربانیاں ہماری قومی سلامتی و آزادی کی ضمانت ہیں، دہشتگردی کے مکمل خاتمے کیلئے پوری قوم سکیورٹی فورسز کے شانہ بشانہ کھڑی ہے۔
سپیکر قومی اسمبلی کا کہنا تھا کہ سکیورٹی فورسز کے بہادر جوانوں کی قربانیاں رائیگاں نہیں جائیں گی، قوم کو اپنے بہادر افسروں اور جوانوں پر فخر ہے، پوری قوم اور سکیورٹی فورسز ملکر دشمن کی ہر سازش کو ناکام بنائیں گے۔
انہوں نے کہا کہ پاکستان کے دفاع و استحکام کیلئے جانوں کا نذرانہ دینے والے قوم کے حقیقی ہیرو ہیں، دہشتگردوں کے خلاف سکیورٹی فورسز کی پیشہ ورانہ کارروائیاں قابلِ تحسین ہیں۔
سپیکر قومی اسمبلی نے شہید کے اہلخانہ سے دلی تعزیت اور ہمدردی کا اظہار کیا اور کہا کہ دکھ کی گھڑی میں شہید میجر رب نواز طارق کے اہلخانہ کے غم میں برابر کا شریک ہوں، سپیکر قومی اسمبلی نے شہید میجر سید رب نواز طارق کے درجات کی بلندی اور سوگوار خاندان کیلئے صبر جمیل کی دعا کی۔
