کراچی: (دنیا نیوز) ایم اے جناح روڈ، صدر سیون ڈے سی بریز پلازہ کے قریب آتشبازی کے سامان کے گودام میں آتشزدگی سے 20 سے زائد افراد زخمی ہو گئے۔
چیف فائر آفیسر ہمایوں خان کے مطابق فائر بریگیڈ کی دو گاڑیاں اور ایک باؤزر آگ بجھانے میں مصروف ہیں، کے ایم سی کے 5 فائر ٹینڈرز اور ایک اسنارکل بھی موقع پر روانہ کر دیئے گئے۔
ایس ایس پی ساؤتھ مہزور علی کے مطابق واقعہ میں 20 سے زائد افراد زخمی ہوئے، بیشتر افراد کو شیشے لگے ہیں، زخمی ہونے والے افراد کو ریسکیو ایمبولینس کے ذریعے سول اور جناح ہسپتال منتقل کر دیا گیا ہے۔
چیف فائر آفیسر ہمایوں خان نے دنیا نیوز سے گفتگو کرتے ہوئے بتایا کہ آتش گیرمادے کا دھماکہ بہت زوردار تھا، دو سے تین کمروں میں بارود بھرا ہوا ہے۔
انہوں نے کہا کہ ہماری کوشش ہے کمروں میں رکھا گیا آتش گیرمادہ نہ پھٹے، ہماری پوری کوشش ہے جلد سے جلد آگ پر قابو پالیا جائے۔
انتظامیہ کے مطابق 10 سے زائد گاڑیاں آگ بجھانے میں مصروف ہیں، دھوئیں کی وجہ سے ریسیکو ٹیموں کو مشکلات کا سامنا ہے، دوسری جانب جناح ہسپتال میں ایک زخمی کی حالت تشویشناک ہے۔
ڈی آئی جی ساؤتھ اسد رضا کا کہنا ہےکہ پٹاخوں کے گودام کا لائسنس چیک کیا جا رہا ہے، اگر لائسنس نہیں ہوا تو کارروائی کی جائے گی۔
وزیرداخلہ سندھ نے ڈی آئی جی ساؤتھ سے تفصیلات طلب کر لیں
وزیر داخلہ سندھ ضیاء الحسن لنجار نے ڈی آئی جی ساؤتھ سے تفصیلات طلب کرلیں اور کہا کہ زخمیوں کو ریسیکیو کرنے کے لئے پولیس کمک روانہ کی جائے، زخمیوں کی قریبی ہسپتال منتقلی اور علاج معالجہ کے لئے جملہ اقدامات کئے جائیں۔
ضیاء الحسن لنجار نے کہا کہ آتشزدگی واقعہ کی تفتیش اور تحقیق کی رپورٹ جلد ارسال کی جائے، زخمیوں کے بیانات سمیت جائے وقوعہ پر دستیاب شواہد کو بھی تحقیقات کا حصہ بنایا جائے۔
وزیر داخلہ سندھ کا کہنا تھا کہ واقعہ کی تفتیش سے آگاہ رکھا جائے، فوری طور پر چیک کیا جائے کی ان کے پاس لائسنس ہے یا نہیں۔
گودام میں غیر قانونی طور پر کافی زیادہ دھماکہ خیز مواد رکھا گیا تھا: انچارج سی ٹی ڈی
انچارج سی ٹی ڈی راجہ عمر خطاب نے کہا ہے کہ آتش بازی کے گودام میں 50 کلو سے زائد مواد رکھنے کی اجازت نہیں ہے، گودام میں غیر قانونی طور پر کافی زیادہ دھماکہ خیز مواد رکھا گیا تھا۔
عمر خطاب نے کہا کہ ماضی میں بھی گودام کے خلاف ہم کارروائی کر چکے ہیں، گودام سے دو ٹن سے زائد دھماکہ خیز مواد ملا تھا۔
انہوں نے کہا کہ اس گودام کو یہاں قائم کرنے کی اجازت کس نے دی اس کی تحقیقات ہونی چاہئیں، یہ غفلت بڑے سانحے کا سبب بن سکتی ہے۔
زخمی ہونے والے افراد کی شناخت
پٹاخوں کے گودام میں آتشزدگی کے باعث زخمی ہونے والے افراد کی شناخت اور کس ہسپتال میں زیر علاج ہیں۔
1- وسیم ولد جمعہ خان عمر 45 سال (سول ہسپتال)، 2- نوید احمد ولد عزیز الرحمان عمر 40 سال (سول ہسپتال)، 3- اختر شاہ ولد وکیل شاہ عمر 30 سال (سول ہسپتال)، 4- خوشی محمد ولد قیوم خان عمر 40 سال (سول ہسپتال)، 5- ریحان ولد عاقب عمر 18 سال (سول ہسپتال)۔
6- شاہ میر ولد شہزاد عمر 20 سال (سول ہسپتال)، 7- رحمان ولد عاقب عمر 17 سال (سول ہسپتال)، 8- جاوید ولد مقبول عمر 65 سال(سول ہسپتال)، 9- فاروق ولد اشرف عمر 35 سال (سول ہسپتال)، 10- محمد اقبال ولد نعمت اللہ عمر 60 سال (سول ہسپتال)، 11- محمد رفیق ولد عامر بخش عمر 60 سال (سول ہسپتال)۔
12- وجے ولد کومل عمر 19 سال (جناح ہسپتال)، 13- فدا حسین ولد سلطان عمر 35 سال (جناح ہسپتال)، 14- ارشد ولد حسین اشرف عمر 30 سال (جناح ہسپتال)، 15- عدنان ولد حامد عمر 28 سال (جناح ہسپتال)، 16- دین محمد ولد حاشر عمر 25 سال (جناح ہسپتال)۔
17- یکدیش کمار ولد بہار چن عمر 40 سال (جناح ہسپتال)، 18- ایوب ولد عثمان عمر 45 سال (جناح ہسپتال)، 19- عابد ولد محمد سلمان عمر 40 سال (جناح ہسپتال)، 20- حنیف ولد عثمان عمر42 سال (جناح ہسپتال)، 21- سعید ولد فرید احمد 50 سال (جناح ہسپتال)۔
22- محمد سلیم ولد حسین عمر 48 سال (جناح ہسپتال)، 23- کاشف ولد منظور عمر 32 سال (جناح ہسپتال)، 24- عمار ولد زلفقار عمر25 سال (جناح ہسپتال)، 25- حماد ولد معوز عمر 23 سال (جناح ہسپتال)، 26- نزاکت ولد حسین عمر 29 سال (جناح ہسپتال)، 27- عارف ولد محمد ہارون عمر 24سال (جناح ہسپتال)۔
