اسلام آباد: (دنیا نیوز) محکمہ موسمیات نے 29 اگست تا 2 ستمبر اسلام آباد سمیت ملک کے بیشتر علاقوں میں گرج چمک کے ساتھ مزید بارش کی پیشگوئی کر دیا۔
رپورٹ کے مطابق پنجاب کے شمالی و شمال مشرقی اضلاع میں 30 اور 31 اگست کے دوران شدید بارشوں کا امکان ہے جس سے سیلابی صورتحال متوقع ہے۔
شمالی اضلاع میں راولپنڈی، اٹک، جہلم، چکوال، لاہور، گوجرانوالہ، سیالکوٹ، گجرات، نارووال، حافظ آباد، منڈی بہاؤالدین شامل ہیں۔
محکمہ موسمیات کے مطابق وسطی و جنوبی پنجاب میں 29 تا 31 اگست کے دوران بارشیں متوقع ہیں جس سے نشیبی علاقے زیرآب آنے کا خدشہ ہے۔
رپورٹ کے مطابق ملتان، ڈی جی خان، راجن پور، لیہ، بھکر، ساہیوال، بہاولپور، بہاولنگر اور رحیم یار خان میں ممکنہ بارشوں کے باعث سیلابی صورتحال کا خطرہ ہے۔
محکمہ موسمیات کے مطابق خیبر پختونخوا میں 29 تا 31 اگست کے دوران شدید بارشیں، ملاکنڈ و ہزارہ ڈویژن میں لینڈسلائیڈنگ ہو سکتی ہے۔
کے پی اضلاع میں چترال، دیر، سوات، بونیر، مانسہرہ، ایبٹ آباد، پشاور، نوشہرہ، مردان، ڈی آئی خان، ٹانک، کوہاٹ اور بنوں شامل ہیں۔
رپورٹ کے مطابق آزاد کشمیر میں مظفرآباد، باغ، حویلی، کوٹلی، میرپور، بھمبرمیں 29 اگست تا 2 ستمبر کے دوران شدید بارشیں متوقع ہیں جس سے لینڈ سلائیڈنگ کا خدشہ ہے۔
گلگت بلتستان میں 29 تا 31 اگست تک بارشوں کا امکان ہے، لینڈ سلائیڈنگ اور گلیشیائی جھیلوں کے پھٹنے (GLOF) کا خدشہ بھی ظاہر کیا گیا ہے، گلگت بلتستان کے اضلاع میں گلگت، سکردو، ہنزہ، دیامر، استور، غذر اورگانچھے شامل ہیں۔
محکمہ موسمیات کے مطابق سندھ کے ساحلی اضلاع کراچی، ٹھٹھہ، سجاول، بدین، تھرپارکر میں 30 اگست تا 2 ستمبر کے دوران بارشیں متوقع ہیں، کراچی میں ممکنہ شدید بارشوں کے باعث شہری سیلاب متوقع ہے۔
اندرون سندھ کے اضلاع بشمول حیدرآباد، دادو، سکھر، گھوٹکی، لاڑکانہ، جیکب آباد، کشمور میں 30 اگست تا یکم ستمبر موسلا دھار بارشوں کا امکان ہے۔
رپورٹ کے مطابق بلوچستان کے ساحلی و مشرقی اضلاع بشمول گوادر، کیچ، پنجگور، خضدار، لسبیلہ، قلات میں 29 اگست تا یکم ستمبر تک بارشیں، نشیبی علاقوں سیلاب آسکتا ہے۔
ممکنہ مزید بارشوں کے نتیجے میں دریائے راوی، ستلج اور چناب کے ملحقہ علاقوں میں سیلابی صورتحال میں مزید شدت متوقع ہے۔
محکمہ موسمیات کی جانب سے کہا گیا ہے کہ کسی بھی ایمرجنسی کی صورت میں فوری طور پر مقامی انتظامیہ اور ریسکیو حکام سے رابطہ کریں۔
متاثرہ علاقوں میں این ڈی ایم اے تمام متعلقہ اداروں کی جانب سے جاری امدادی کارروائیوں کی ہمہ وقت نگرانی کر رہا ہے، ہنگامی صورتحال سے نمٹنے کے لیے تمام ادارے اقدامات کو یقینی بنا رہے ہیں۔
رپورٹ کے مطابق ممکنہ طور پر مزید بارشوں کی صورت میں پہاڑی علاقوں میں لینڈ سلائیڈنگ اور دریاؤں کے ملحقہ علاقوں میں سیلابی صورتحال کا خدشہ ہے، بارشوں اور سیلاب کے دوران شہری محتاط رہیں اور حفاظتی اقدامات یقینی بنائیں۔
محکمہ موسمیات نے سیاح حضرات سے اپیل کی ہے کہ ممکنہ بارشوں اور لینڈ سلائیڈنگ کے خطرے کے پیش نظر شمالی علاقہ جات کا سفر کرنے سے گریز کریں۔
