لاہور: (روزنامہ دنیا) شادی شدہ جوڑوں میں طلاق سے قبل از وقت موت کا خطرہ 50 فیصد تک بڑھ جاتا ہے۔ ایک تحقیق میں یہ بات سامنے آئی ہے کہ شادی شدہ افراد میں اپنے شریک حیات سے علیحدگی انہیں وقت سے پہلے ہی موت کے منہ میں لے جاسکتی ہے۔
امریکی یونیورسٹی میں شادی شدہ جوڑوں کے تعلقات پر تحقیق سے پتہ چلا ہے کہ چونکہ طلاق کا اعصابی اور نفسیاتی اثر ہوتا ہے اس لیے علیحدگی یا طلاق سے شخص کی صحت پر انتہائی مضر اثرات مرتب ہوتے ہیں۔ تحقیق میں بتایا گیا کہ جب شوہر اور بیوی ایکساتھ ہوتے ہیں تو ایک دوسرے کا خیال رکھنے کیساتھ ساتھ بری عادات سے بھی ایک دوسرے کو دور رکھتے ہیں اسکے بعد انہیں روک ٹوک کرنیوالا کوئی نہیں رہتا اور یوں طلاق کے بعد تنہا فریق تیزی سے جسم دشمن عادات اختیار کرنے لگتا ہے۔ واضح رہے کہ اس وقت امریکہ میں 50 فیصد سے زائد اور برطانیہ میں 42 فیصد شادی شدہ جوڑے طلاق یافتہ ہیں۔
