دبئی: (ویب ڈیسک) دبئی میں پاکستان سپر مارکیٹ صارفین کو آم خریدنے پر سپر کار لیمبورگینی میں مختصر رائیڈ کا موقع بھی دیتی ہے۔
تفصیلات کے مطابق پاکستان کے آم دنیا بھر میں مشہور ہیں اس بات سے تو ہم سب ہی واقف ہیں لیکن حال ہی میں دبئی کے پاکستانی سپر مارکیٹ نے صارفین کو پاکستانی آم کے ساتھ زبردست پیشکش کی ہے۔
غیر ملکی خبر رساں ادارے کے مطابق پاکستان سپر مارکیٹ دبئی کے مینیجنگ ڈائریکٹر کا کہنا ہے کہ اس آفر کی پیشکش کے بعد آم کی فروخت دگنی ہوگئی ہے جو کہ جون کے درمیان سے صارفین کے لیے پیش کی گئی تھی۔
اس آفر سے مستفید ہونے کے لیے صارف کو کم سے کم 100 درہم کا آرڈر کرنا ضروری ہے۔
سپر مارکیٹ کے مینیجنگ ڈائریکٹر جہانزیب یاسین کا کہنا ہے کہ اس مہم کے پیچھے ہمارا کوئی ایسا مقصد نہیں تھا کہ ہم اپنی مارکیٹ کی تشہیر کریں بلکہ ہمارا صرف ایک مقصد تھا کہ لوگ خوش ہو سکیں اور ہم محبت بانٹ سکیں اور ہمیں اس کا بے حد اچھا ردِ عمل ملا۔
انہوں نے کہا کہ اس آفر کے بعد ہمارے آموں کی فروخت 100 فیصد تک بڑھی ہے اور اس آفر کو حاصل کرنے کے لیے صارفین کو ایک ہفتے قبل رجسٹریشن کروانی ہوتی ہے۔
جہانزیب یاسین کا کہنا تھا کہ ہمیں ایسا لگ رہا تھا کہ دبئی میں پاکستانی اور بھارتی کمیونٹی ہی اس آفر میں دلچسپی لے گی مگر ہم حیران ہیں کہ یہاں موجود مغربی ممالک کی کمیونٹی بھی اس آفر کو حاصل کر رہی ہے۔
سوشل میڈیا پر یہ مہم خوب وائرل ہو رہی ہے جس میں آم خریدنے والے کو لیمبورگینی میں مختصر رائیڈ دی جاتی ہے۔
