ہیوسٹن: (دنیا نیوز) امریکا میں پاکستانی خاتون اسلاموفوبیا کا شکار بن گئی۔
ہیوسٹن میں پاکستانی خاتون پر سکارف پہننے پر حملہ کیا گیا، ناک کی ہڈی ٹوٹ گئی، سی سی ٹی وی فوٹیج میں ایک شخص کو پاکستانی نژاد خاتون کو دھکا دیتے ہوئے دیکھا جاسکتا ہے، خاتون منہ کے بل سڑک پر گر پڑیں۔
یہ واقعہ ساؤتھ ولکریسٹ ڈرائیو پر واقع شوگر پارک پلازہ کے سامنے پیش آیا، ایک نامعلوم شخص نے خاتون کو پیچھے سے دھکا دے کر زمین پر گرا دیا، خاتون کے منہ کے بل گرنے سے ان کی ناک کی ہڈی ٹوٹی اور چہرے پر شدید چوٹیں آئیں۔
واقعہ سی سی ٹی وی کیمرے میں ریکارڈ ہو گیا، جس میں دیکھا جا سکتا ہے کہ حملہ آور بآسانی سڑک کے دوسری جانب چلا گیا، خاتون کے بیٹے محمد ظہیر نے بتایا کہ اس کی والدہ سکارف پہنے ہوئے تھیں اور ممکنہ طور پر حملہ آور نے انہیں مسلمان سمجھ کر نشانہ بنایا۔
انہوں نے کہا کہ یہ حملہ نفرت پر مبنی جرم ہے اور ملزم کو فوری گرفتار کرکے سخت سزا دی جانی چاہئے، امریکن پاکستانی خاندان نے پولیس رپورٹ درج کرا دی، پولیس کا کہنا ہے کہ گرفتاری کی صورت میں ملزم کو سنگین جرم کے تحت چارج کیا جائے گا۔
