کیلی: (دنیا نیوز) کولمبیا کے شہر کیلی میں بم دھماکے میں8 افراد ہلاک جبکہ 36 افراد شدید زخمی ہوگئے۔
مقامی پولیس نے بتایا کہ دھماکا ایک فوجی ایوی ایشن سکول کے قریب ہوا، جس کا نشانہ بظاہر عسکری تنصیبات تھیں، دھماکا اس قدر شدید تھا کہ کئی کلومیٹر دور تک اس کی گونج سنی گئی، جبکہ نزدیکی عمارتوں اور ایک سکول کو فوری طور پر خالی کرا لیا گیا۔
عالمی میڈیا کے مطابق ایک عینی شاہد نے بتایا کہ ایئر بیس کے قریب زور دار دھماکا ہوا ہر طرف چیخ و پکار تھی اور کئی گھروں کو نقصان پہنچا، شہر کے میئر الیخاندرو ایڈر نے ابتدائی اطلاعات کے مطابق ہلاکتوں کی تصدیق کرتے ہوئے بتایا کہ زخمیوں کی تعداد 36 ہے۔
انہوں نے سکیورٹی خدشات کے پیش نظر شہر میں بھاری گاڑیوں کے داخلے پر عارضی پابندی عائد کر دی اور حملہ آوروں کی نشاندہی میں مدد دینے والے کے لئے 10 ہزار امریکی ڈالر انعام کا اعلان کیا ہے۔
تاحال کسی گروہ نے حملے کی ذمہ داری قبول نہیں کی تاہم میئر ایڈر نے اسے نارکوٹیرورسٹ یعنی منشیات فروشوں کی دہشت گردی قرار دیا ہے۔
یاد رہے کہ جون میں بھی اسی شہر کے نواح میں بائیں بازو سے تعلق رکھنے والے باغیوں کے ایک گروہ سینٹرل جنرل سٹاف (EMC) نے 24 مربوط بم اور فائرنگ حملوں کی ذمہ داری قبول کی تھی جن میں 7 افراد مارے گئے تھے، یہ گروہ 2016ء کے امن معاہدے کو مسترد کر چکا ہے اور 2026ء کے انتخابات سے قبل اپنی سرگرمیاں بڑھا رہا ہے۔
واضح رہے کہ کیلی جو کہ کولمبیا کا تیسرا بڑا شہر ہے اپنے پرجوش نائٹ لائف اور ماضی میں منشیات سمگلنگ سے جڑے جرائم کی وجہ سے جانا جاتا ہے اب ایک بار پھر پرتشدد کارروائیوں کی لپیٹ میں ہے۔
