لاہور: (ویب ڈیسک) پاکستان کرکٹ بورڈ (پی سی بی) کے چیئر مین احسان مانی کا کہنا ہے کہ پاکستان کسی بھی صورت میں اپنی سیریز نیوٹرل مقام پر نہیں کھیلے گا۔ پاکستان ہر ٹیم کے خلاف ہوم سیریز اپنی سرزمین پر ہی کھیلے گا۔
نیشنل سٹیڈیم کراچی میں پریس کانفرنس کرتے ہوئے ان کا کہنا تھا کہ پاکستان نے اپنی سیریز بنگلا دیش کیساتھ اپنے ملک میں ہی کھیلنی ہے، برادر ملک کرے کہ پاکستان محفوظ ملک نہیں ہے۔ بنگلا دیشی بورڈ سے رابطے میں ہیں، یقین ہے کوئی وجہ نہیں ڈھونڈیں گے کہ یہاں کیوں نہیں آنا، اگر بنگلا دیش نہیں آئے تو معاملہ آئی سی سی ڈسپیوٹ میں بھی جاسکتا ہے لیکن فی الحال بات چیت جاری ہے، تبصرہ نہیں کرسکتے۔
PCB Chairman Ehsan Mani press conference at NSK.
— PCB Media (@TheRealPCBMedia) December 23, 2019
Full Video: https://t.co/iIZ9gBe0Go pic.twitter.com/0RXHA7W7OR
احسان مانی کا مزید کہنا تھا کہ جو کہتے ہیں کہ وہ سیکیو رٹی خدشات پر یہاں نہیں آ نا چاہتے تو وضاحت دیں، بنگلا دیش بورڈ سے ہونے والی بات کو ابھی منظرعام پر لا نہیں سکتے۔ ہمارے لیے بڑا چیلنج پاکستان ٹیم کی کامیابی کا تسلسل برقرار رکھوانا ہے، ہمیں ایسی وکٹیں تیار کرنا پڑیں گی جن پر کھیل کر غیر ملکی دورے پر مسئلہ نہ ہو۔
چیئر مین پی سی بی کا کہنا تھا کہ سری لنکن ٹیم کی آمد پر بیحد شکرگزار ہیں، دس سال بعد ٹیسٹ کرکٹ کی واپسی ہوئی جس سے دنیا میں پیغام گیا ہے کہ اب ہمارا ملک انٹرنیشنل کرکٹ کے لیے محفوظ ملک ہے۔ سری لنکا کا پاکستان آکر ٹیسٹ میچ کھیلنا ہماری بڑی کامیابی ہے، راولپنڈی اور کراچی میں ٹیسٹ میچ ہونا ٹرننگ پوائنٹ ہے، پاکستانی عوام نے ان میچز کو بھرپور انداز سے سپورٹ کیا ہے۔
احسان مانی کا کہنا تھا کہ پی سی بی کے معاملات میں کسی کی مداخلت شامل نہیں، میرا خود سلیکشن کمیٹی کے معاملات میں عمل دخل نہیں ہے۔
ان کا سابق کپتان سرفراز احمد کے بارے میں پوچھے گئے سوال کے جواب میں کہنا تھا کہ سرفراز احمد کچھ عرصے سے فارم میں نہیں تھے، پرفارم کرتے ہی ٹیم میں واپس آجائے گا۔ وہ پاکستان ٹیم کے کپتان تھے کراچی کے نہیں، سرفراز احمد نے دورہ آسٹریلیا پر نہ جانے کا فیصلہ خود لیا تھا۔
چیئر مین پی سی بی کا کہنا تھا کہ ساری زندگی میں نے محنت سے کام کیا ہے، میری عمر کا کوئی مسئلہ نہیں ہے، اتنا فٹ ہوں کہ پہاڑ پر چڑھ سکتا ہوں، تنقید ضرور کی جائے لیکن حقائق جاننا بھی لازمی ہے۔ آئی سی سی کے ساتھ کافی عرصے سے منسلک رہا ہوں۔ مجھے لوگوں کی ضرورت ہے جو پاکستان کرکٹ کے لیے کام کریں، سابقہ کھلاڑیوں کی بڑی تعداد ہمارے ساتھ جڑی ہوئی ہے
احسان مانی کا کہنا تھا کہ ایشیا کپ کے معاملات ایشین کرکٹ کونسل کے پاس ہیں، فی الحال ایشیا ٹی 20 کے حوالے سے تبصرہ نہیں کروں گا۔
پی ایس ایل سے متعلق بات کرتے ہوئے انہوں نے کہا کہ پی ایس ایل کے معاملات پر فرنچائز کی جتنی مدد کرسکتے ہیں وہ کریں گے۔ پوری کوشش تھی کہ انگلینڈ ویمنز ٹیم پاکستان میں کھیلے مگر انگلش بورڈ نے پہلے مینز ٹیم کو پاکستان بھیجنے کی خواہش ظاہر کی تھی۔
